«Географийым эн сайын туныктышо» всероссийский конкурсым иктешлыме. Йошкар-Оласе Т.И.Александрова лӱмеш 11-ше номеран лицейын туныктышыжо Я.В.Царегородцева (снимкыште) сеҥышыш лектын. Янина Валерьевна 6-шо класслан «Атмосферное давление вокруг нас» урокым да «Йошкар-Ола – город-сказка» мероприятийым темлен. Жюри эн оҥайлан шотлен да тӱҥ призым, глобусым, кучыктен. Заочный йыжыҥышке Российын 73 кундемже гыч туныктышо-влак ушненыт.
Тиде лицей гычак математикым туныктышо-влак Ю.К.Грачёва ден Т.А.Пахмутова «Шӧртньӧ тӱжем» Российысе эн сай туныктышо радамышке пуреныт.
Россий Просвещений министерстве пелен пашам ыштыше Всероссийский экспертный педагогике советыш Марий Эл гыч кок туныктышо пурен: Йошкар-Оласе Т.И.Александрова лӱмеш 11-ше номеран лицейыште физикым, информатикым, технологийым туныктышо М.Ю.Гришин да Волжск оласе 5-ше номеран школ гыч руш йылмым туныктышо Н.Ю.Полякова.
