14-18 сентябрьыште Марий Элыште «Идалыкын туныктышыжо», «Идалыкын воспитательже», «Уста марий туныктышо» республикысе конкурс-влак эртаралтыныт. 13 туныктышо, 14 воспитатель да марий йылмым 7 туныктышо мастарлыкыштым ончыктеныт, паша опытышт дене палдареныт, почётан лӱмым сеҥен налшаш верч таҥасеныт. Тений таҥасымаш онлайн лийын. «Йыргешке ӱстелыште» туныктымо паша нерген мутланаш да сеҥыше-влакым торжественно саламлаш Советский посёлкыш погыненыт.
«Идалыкын туныктышыжо – 2020» лӱмым 3-шо номеран Советский школышто физикым туныктышо Ольга Анатольевна Костюнина сеҥен налын.
«Уста марий туныктышо» конкурсышто Параньга район Матародо школышто тӱҥалтыш класслам туныктышо Светлана Михайловна Максимова сеҥышыш лектын.
«Идалыкын воспитательже – 2020» почётан лӱмым Татьяна Вячеславовна Александрова, Звенигово оласе «Светлячок» йочасадын туныктышо-дефектологшо, сулен.
Л.ГРИГОРЬЕВА ямдылен.
Фотом «Вестник района» газетын архивше гыч налме.
