4 апрельыште Республикысе курчак театр 250 утла йочалан шке омсажым почын. Амалже – Марий тӱвыра рӱдерын эртарыме «Самырык тукым» йоча усталык конкурс. Тушко республикысе лу район гыч ӱдыр-рвезе-влак погыненыт. Нуно «Муро», «Куштымаш» да «Сылнымут-сылнысем композиций» таҥас почеш мастарлыкыштым ончыктеныт.
Мероприятий кажне ийын ойыртемалтшын эртаралтеш. Тений пайрем Шочмо элым аралышын идалыкшылан да Кугу Ачамланде сарыште Сеҥымашлан 80 ий теммылан пӧлеклалтын. Йоча-влак темым келгын почын ончыктеныт. Теве 1-ше номеран Морко школын «Чолга шӱдыр» коллективше «Эргына-влак шочыт да каят» композиций дене кажне ончышын чонышкыжо логалын да шинчавӱдым луктын. Нуно шке номинацийыштышт 9-11-ше классла коклаште икымше верым сеҥен налыныт.
– Тыгай конкурсыш ушнымаш йоча-влак коклаште сылнымут шӱлышым ылыжта, йылмым, тӱвырам шымлаш тарата. Адакшым икшыве-влак калык ончылно шкеныштым ончыкташ тунемыт. Ме ты таҥасымашлан кужун ямдылалтынна. Садлан лектышыжат сай, – ойла коллектив вуйлатыше София Васильевна Никитина.
Чынжымак, кыртмен тыршымаш веле сеҥымашым конда. Ты ой дене Морко район Октябрьский школышто тунемше София Сенькинат келша. Тудо «Шочмо верем» мурым йоҥгалтарымыж дене шке ийготан-влак коклаште ончыко лектын. Артист койышан, уста улмыжлан Марий Эл Кугыжаныш Погын Председательын алмаштышыже Лариса Яковлева пӧлекым кучыктен.
«Самырык тукым» конкурсышко куштышо ятыр ансамбль ушнен. 2-шо номеран Шернур школын «Грация» ансамбльже «Шернур куштымашым» аклымашке луктын. Ӱдыр-влакын сценыште лывыла иймыштым жюри кӱкшын аклен да икымше верым пуэн.
– Ме тӱрлӧ калыкын куштымашыжым тунемына, репертуарыштына кызытсе хореографият уло. Конкурслаш ушнашак тыршена, чӱчкыдын сеҥыше радамыш лектына. Ансамбль дене Ставрополь, Чебоксар, Зеленодольск олалаш миенна, –палдара куштышо коллективын ик участникше Анна Бердинская.
Калык ончыко лӱдде лекташ, шке мастарлыкым устан ончыкташ кугу кӧргӧ вий кӱлеш. «Самырык тукым» конкурсыш ушнышо кажне йоча – шке семынже сеҥыше. Сеҥыше-влакым Марий тӱвыра рӱдерын «ВКонтакте» лаштыкыштыже пален налаш лиеш.
Оля МАЙКОВА.
Авторын фотожо-влак.
