Тений Кугу Ачамланде сарыште Сеҥымашлан 80 ий темын. Авам могыр гыч кугезе кочамат сеҥымашым лишемдаш полшен. Тихон Константинович Орехов 1909 ий 29 июньышто Кӱанэҥер ялеш шочын. Кочана сарыш икымше кечылаштак каен. Ялеш пелашыже да кум йочаже кодыныт. Тихон Константинович 324-ше инженерно-сапёрный батальонышто, 62-шо инженерно-сапёрный бригадыште, 4-ше гвардейский стрелковый корпусышто лийын. Кочамым уста сапёр семын акленыт. Тудо Сталинград, Кёнигсберг да моло олалам утарымаште кредалын. Берлин марте шуын. Родо-тукымем архив документлам муын. Тушто ятыр подвигше нерген раш возалтын. Кугезе кочам Йошкар Шӱдыр, I да II степенян Кугу Ачамланде сар орден-влак, «За оборону Сталинграда» медаль дене палемдалтын.
Сар пытымеке, Тихон Константинович шочмо ялышкыже герой семын пӧртылын. 1993 ий 8 майыште ӱмыржӧ кӱрылтын. Кугезе кочам нерген эре шарнаш тӱҥалына.
Роман КОРНЕВ.
Татарстан, Агрыз, Буймо.
