Могай гына сылне марий лӱм уке?! Онар, Яндар, Эрвина, Элавий… Марий лӱман ӱдыр-рвезе-шамычым Башкортостан Республикыште поснак чӱчкыдын вашлияш лиеш. Нунын кокла гыч иктыже – Шаран район Наратаст школын тунемшыже Эрвика Минькаева (снимкыште). «Ӱдырлан тыгай лӱмым кӧ пуэн?», – ты йодыш эн ончыч шочо.
– Марий лӱмым ачам ден авам пуэныт. Авам – Наталья Мурзагуловна, марий йылме, руш йылме да литература дене туныкта. Садлан сылне марий лӱмым шуко пала. Мыланем Эрвикам ойыреныт. Вика лӱмжӧ Виктория гыч лектын, сеҥымаш манме лиеш, эр — эрдене шочшо. Тыгай лӱм Шаран кундемлан икте веле. Армян калык коклаштат вашлиялтеш. Мый лӱмемын вийжылан ӱшанем. Эре сеҥаш тыршем. Шкемым нигунам Вика ом ман, тичмашын ойлем, йолташем-шамычат тыгак, – палдарыш ӱдыр.
Эрвикам лӱмжӧ, чынак, сеҥаш тарата. Ӱдыр икымше класс гычак тӱрлӧ конкурсышто, таҥасымаште, конференцийыште, олимпиадыште уш-акылжым да мастарлыкшым терга. Сӱретлаш, почеламутым сылнын лудаш, шахмат, волейбол дене модаш поснак йӧрата. Чыла «визытанлан» веле тунемеш. Шымлыме пашаже ятыр.
«Совёнок-2025.Исследование как метод познания…» школьник-влакын всероссийский шанче-практике конференцийыштышт «Марийцы – единственный народ в Европе, сохранивший язычество. На примере марийцев Шаранского района» теме дене сеҥышыш лектын. Шанче-шымлыме паша да проект-влак республикысе конкурсышто икмыняр гана ончылно лийын. «Отечество» межрегиональный конкурсышто «Летопись родного края и этнография» таҥасыште икымше вер дене палемдалтын.
– Пытартыш кок ий жапыште авам да туныктышо Гузель Фирзатовна Кучмухаметова дене Шаран кундемысе марий калыкын тӱвыражым, йӱлажым, ял-влакын кушеч лекмыштым шымлена, легендым погена. Кумалтыш йӱлалан тӱткышым ойырена. Школыштына марий йылмым огыт туныкто. Ачамден авам чыла умылтарат, нунылан кугу тау, – ойла ӱдыр.
Эрвика яра жапыште мураш йӧрата. Ончыч «Созвездие» мурышо ансамбльыш коштын. Кызыт жапше шагалрак, садлан тӱткышым тунемме пашалан ойыра. Ончыкыжым историй дене туныктышо лийнеже.
– Ушышто марий калык дене кылдалтше шуко йодыш пӧрдеш. Келге шинчымашым налын, чыла шымлен кертам, шонем, – ойла ӱдыр.
Тек шонымашыже шукталтеш!
Х.АЛЕКСАНДРОВА.
Фотом еш архив гыч налме
