Пытартыш жапыште марий лӱм-влакым утларак да утларак колына. Оршанке район Кӧрдӧ ялыште эртаралтше «Кеҥеж сылнымутчо-2020» семинарыште куд ияш Яндар да ныл ияш Эвика Маникаевмыт дене палыме лийым. Нуно ача-авашт дене пырля, кужу корным ончыде, Нефтекамск ола гыч толыныт. Елена ден Денис коктынат моткоч марий шӱлышан улыт. Денис Владимирович 1-ше номеран лицейыште физкультурым туныктышылан тырша, Елена Игнатьевна – 3-шо номеран школышто логопед.
– Икшыве-влаклан марий лўмым пуаш шонымаш кузе шочын?
– Ме икмыняр гана Марий самырык тукым слётыш толынна. Слёт деч вара тыгай шонымаш шочын. Марий лӱм-влакым Интернетыште онченна. Моткоч шуко кычалынна. Южо лӱм-влак ятыр гана вашлиялтше лийыныт. Тугайым ойырен огынал.
– Ешыште изинек икшыве-влак дене марла гына кутыреда. Йочасадыш кайымышт годым нелылык лектын огыл?
– Йоча-влак йӧршын рушла кутырен моштен огытыл. Воспитатель-влак иктыже руш, весыже татар улыт. Йочасадыште психолог гына марла мошта. Тудо кажне кечын группышко кусарыше семын коштын. Яндар кок тылзе жапыште, Эвика ик тылзе гыч рушла кутыраш тунемыныт. Очыни, телевизор дене тӱрлӧ мультфильмым ончымыштат руш йылмым тунеммаште кугу шӱкалтышым ыштен. Кажне гана мемнан деке толыт да мутым кусараш йодыт ыле. Мутлан: «Мераҥ» рушла кузе лиеш?» Але мӧҥгешла: «Медведь» мом ончыкта?» Ме икшыве-влакым кум ий марте йочасадыш колтен огынал. Тыге ешыште йылмышт лывырген, марий шомак чонышкышт шыҥен.
– Еш дене марий мероприятий, конкурслаште мастарлыкдам ончыктеда, очыни.
– Йоча-влак изинек калык коклаште лияш, калык ончылно шкеныштым кучаш тунемышт манын, тӱрлӧ вере кошташ тыршена. 2018 ийыште Нефтекамск олаште эртаралтше «Идалыкын ешыже» конкурсышко ушненна. Ме марий тувырым чиен муренна, куштенна. «Эн ушан еш» таҥасыште ойыртемалтынна.
– Палем, те Яндар ден Эвикам изинек лудаш шӱмаҥдеда.
– Ме шкежат лудаш йӧратена. Икшыве-влакын ийготыштлан келшыше чыла гаяк марий йомакым лудын пытаренна. Руш йомак-шамычымат сайын палат. Кызыт мордва йомак-влакым шергалына. Нуно руш йылме дене сералтыныт. Ме иканаште марий йылмыш кусарена да каласкалена. Малаш вочмышт деч ончыч южгунам кум йомакым лудына.
– Елена, те сылнымут дене пеҥгыде кылым кучеда. Икшывыда-влакат тендам ончен, ончыкыжым возаш тӱҥалыт, очыни.
– Мый утларакше йоча-влаклан келшыше ныл корнан почеламут-влакым возаш йӧратем. Тимирьянова фамилий дене савыкталтам. Шукерте огыл «Ямде лий» газетым налаш тӱҥалынна. Яндар куанен лудеш, Эвика колыштеш. Йоча-влакын возымыштым ончен, школыш кайымекыже, эргына тендан юнкорда лиеш манын ӱшаныме шуэш.
Х.АЛЕКСАНДРОВА мутланен.
Фотом еш архив гыч налме.
