Совет фотограф Е.А.Халдей лÿмеш «Без срока давности» фото альбомым ямдылыме всероссийский конкурсышто Марий Эл гыч кок паша сеҥыше радамыш лектын. Таҥасымашке Российын 66 регионжо гыч 575 паша пурен. Тышеч 82-шо поснак ойыртемалтын.
«Осуждение военных преступлений, преступлений против мира и человечности, совершенных нацистами и японскими милитаристами в годы ВОВ (к 80-летию начала Международного военного трибунала для дальнего Востока и 80-летию завершения Международного военного трибунала в Нюрнберге)» теме дене кылдалтше йыжыҥыште Советский район Роҥго школышто тунемше-влак Александра Степанова, Полина Глушкова да Софья Таныгина ончылно лийыныт. Вуйлатышышт – Н.В.Шабалина. «Культурный геноцид на оккупированной нацистами территории Советского Союза в годы ВОВ» таҥасыште 2-шо номеран Кужэҥер школышто 9-ше «А» классым тунем пытарыше Мария Швецова (снимкыште) ойыртемалтын.
– Историйым шымлаш келша. Интернетыште тÿрлӧ уверым лаштыклымем годым Кугу Ачамланде сар жапыште шаланен пытыше Новгород олан фотожым верештынам. Тиде ты кумдыкын эртыкшым шергал лекташ кумылаҥден. Уверым тошто газетлаште, олан архившын сайтыштыже, военный альбомышто кычалынам. Тыге «Новгород, что же с тобою сделали?» паша шочын. Наставникем Людмила Евгеньевна Аблиновалан полшымыжлан, историй деке шÿмаҥден моштымыжлан тауштем, – ойла Мария.
Оля МАЙКОВА.
Фотом еш архив гыч налме.
