Йошкар-Оласе Мер-политик рӱдерыште «Мыйын еш архивем» республикысе конкурсым иктешленыт. Тудым Марий Эл Республикысе йоча да подростко-влакын «Эр вий» ушемышт эртарен. Тений конкурс Всесоюзный пионер организацийын 100 ияш лӱмгечыжлан пӧлеклалтын да «Галстук мыйын ешыштем» маналтын. Финалыш лекше еш-влак «Муро семын кызытат шарнем…» фотосӱрет, «Еш тоштер» таҥаслаште мастарлыкыштым ончыктеныт. Пайремыш республикысе тӱрлӧ район да ола гыч 24 еш ушнен.
Йошкар-Ола гыч Катя ден Саша Шевелевмыт (снимкыште) «Еш тоштер» таҥасыште икымше верым сеҥен налыныт. Нуно ковашт, чӱчӱшт, авашт деч пионер жапысе илыш да паша нерген йодыштын, тошто газетлам шергалын, аралалт кодшо фотом, значокым, галстукым да моло арверым поген, ончерым чумыреныт. Ты пашам ворандарен колташ ковашт полшен.
– Кована Маргарита Леонидовна Голомидова (Кузнецова) Оршанке район Чирки школышто тунемын. Туштак тудым пионер радамыш пуртеныт. Дружинышт партизанке Зоя Космодемьянскаян лӱмжым нумалын. Рита кована дружине советын председательже лийын. Школым тунем пытарымеке, шочмо школыштыжо вожатыйлан пашам ыштен. Руш йылме ден литературым туныктен. Тудо пашан ветеранже, Калык просвещенийын отличникше. Чӱчӱна Сергей Иванович Голомидов 1982 ийыште пионер радамыш ушнен. 1984 ийыште «Артек» всесоюзный пионер лагерьыште лийын. Лагерь гыч кондымо пӧлекше, медальже, чапкагазше-влак еш ончерыштына ик эн тӱҥ верым айлат. Авана Елена Ивановна Шевелева пионер лийын. Лишыл еҥна-влак мыланна пример улыт. Нунын гаяк чолга, лӱддымӧ лияш тыршена, – ойлат Катя ден Саша.
Советский район Кельмаксола гыч Катя Беляева кокаже-влак А.Н.Рассолова да Л.Н.Мочалова дене пырля «Муро семын кызытат шарнем…» фотосӱрет таҥасыште икымше верыш лектыныт. Алевтина Николаевна ден Людмила Николаевнан пионер жап нерген поро шарнымашышт Катям конкурсыш ушнаш кумылаҥден.
– Тошто газет гыч пӱчкеден лукмо лаштыклам, фото-влакым, галстукым, значокым да молым посна папкыште аралена. Чыла тидым чемоданыш вераҥденна да моторын войзенна. Сылне фотом ышташ Интернетыште тӱрлӧ видеом онченна, – ойла Катя. – Конкурслан кӧра пионер паша нерген шуко оҥайым пален налынам. Иктым раш каласен кертам, ондак тимуровец-влак лийыныт гын, кызыт волонтёр-шамыч улыт. Тугеже пионерийын шуктен шогымо сомылжым кызытат шуена. Мый «Эр вий» йоча организацийын еҥжылан шотлалтам, поро пашам ышташ эре ямде улам. Тиде мемнан икымше кугу сеҥымашна да ончыкылыклан кугу ошкыл.
Таҥаслаште Семёновмыт (Марий Турек, Карлыган), Романов-Степановмыт (Советский, Алексеевский), Васильевмыт (Волжский, Пӧтъял), Богдановмыт (Марий Турек, Косолап), Сергеевмыт (Морко посёлко), Москалевмыт (Йошкар-Ола) еш-влак ойыртемалтыныт.
