Гармонь, баян, балалайке, домр, кӱсле, синтезатор, фортепиано, тӱмыр… Тиде да ятыр вес семӱзгар дене Волжский округ Пӧтъял школ пеленысе «Изи шӱдыр» ансамбльыш коштшо кандаш ӱдыр-рвезе шокта (снимкыште). Вуйлатыше – Т.Е.Васильева.
Татьяна Евгеньевна 2023 ийыште школыш советниклан пашам ышташ толын да музыклан шӱман йоча-влакым шке йырже ты ийынак чумырен. Тӱрлӧ семӱзгар дене палдарен, нунын йоҥгымыштым шижаш да, икте-весым колыштын, семым шочыкташ туныктен.
– Коллективна самырык гынат, шукылан палыме. Йоча-влак шке моштымыштым школышто, верысе клубышто да районысо ятыр мероприятийыште ончыктат. Кодшо ийын Козьмодемьянск олаште эртаралтше «Шанавїл – семь цветов, семь нот» йоча этнический фестивальыште кумшо верым сеҥен налыныт. Пеш йывыртеныт ыле. Тылеч вара республикысе конкурслаш ушнаш кумылаҥыныт. Сеҥымашышт уло, – палдарыш самырык вуйлатыше.
Татьяна Евгеньевна шкежат йочаж годым гармонь дене шоктен. Йошкар-Оласе И.С.Палантай лӱмеш тӱвыра да сымыктыш колледжыште, Петрозаводск оласе Карел кугыжаныш филармонийыште семмастар семын вияҥын.
– Музыклан тунемаш кугу чытыш кӱлеш. Ик сомылым кужу жап ышташ ямде лийман. Ик семӱзгар дене сайын шокташ тунем шумеке, умбакыже куштылгырак лиеш. Ансамбльыш коштшо-шамыч ончыч совла дене перкаленыт гын, кызыт бас-гитарым, контрабасым да моло семӱзгарымат мастарын шоктат, – ойла Т.Е.Васильева.
Оля МАЙКОВА.
Фотом ансамбльын архивше гыч налме.
