Республикысе марий тӱвыра рӱдер пеленысе «Падыраш» йоча ансамбльым ятыр гана сценыште ужаш логалын. Участник-влак койышышт, мастарлыкышт дене кажне ончышым шкешт деке савырат. Тачысе лаштыкын геройжо, ты коллективын ик чолга шӱдыржӧ — Богдан Тымбаршев.
Рвезе Йошкар-Олаште ила. Калыкле сымыктыш гимназийыште 3-шо классым тунем пытарен. «Падыраш», «Онар» йоча ансамбль-влакын участникше. Баяным, гитарым шокта, фортепианыште кидше модеш веле. Тӱмырым кыра, утларакше гармонь семым йӧрата.
Кӱмыж-совлат — семӱзгар
Йочан мастарлыкшым изиж годым шекланен шуктыман да чын корныш виктарен моштыман. Богданын талантшым аваже Наталия Георгиевна Антропова вигак шекланен.
— Изиракше годымак йырже кӱмыж-совлам шында да перкален шинча ыле. Иктаж кок ий эртымеке, гармоньым шупшкедаш тӱҥалын. Семӱзгар шеҥгеч вуйжо веле коеш ыле. Икымше классым Йошкар-Оласе 2-шо номеран школышто тунем пытарен. Тылеч вара Эвелина акаже Калыкле сымыктыш гимназийыш колташ темлен. Изиш ямдылалтын, икымше тергымашке каенна. Эргымым вигак баян классыш налыныт, — ойла Наталья Георгиевна.
Талант памаш шолеш
«Кӧ дене кылым кучет, тудын гай лият», — маныт калыкыште. Богданлан уста еҥ-влак дене вашлийын мутланаш, нунын деч тунемаш келша. Кресачаже, мурызо Вадим Краснов, эре ой-каҥаш дене полша. Икымше семым Богданлан тале гармонист Александр Лопкин туныктен.
— Иктаж семым колмеке, вигак шоктен кертам. Ялыш але иктаж-куш вес вере унала каена гын, пеленем эре гармоньым налам, — манеш уста рвезе.
Чылажат еш гыч тӱҥалеш
Богданын Сергей кугезе кочаже тале гармонист лийын. Ачаже Алексей Иванович Тымбаршев кушташ да мураш тале. Сӱаныште ятыр гана савуш лийын. Кызыт сварщиклан пашам ышта. Богданын аваже пачерым олмыктымаште тырша. Эргыжын кажне гаяк выступленийышкыже коштеш, ой-каҥаш дене полша, лыпландара, ӱшаным ешара. Акаже Эвелина Антропова Марий кугыжаныш университетыште икымше курсым тунем пытарен. Филолог лияш ямдылалтеш. Тудо кушташ йӧрата. Кандашымше классыште тунеммыж годым «Марий памаш» ансамбльыш ушнен да кызытат тушко коштеш.
— Мыйын яра жапем шукак огыл. Репетиций-влак чӱчкыдын лиедат. Тӱрлӧ концерт ден конкурслаш ушнем. Каныш кечылаште ача-аван шочмо кундемышкышт, КужэМер район Марий Шой да Кораксола яллаш, кудалыштына, — палдарыш Богдан.
Оля МАЙКОВА.
Авторын фотожо.
