Марий Эл Радиом чӱктеда гын, Кужэҥер районын ӱдыржӧ, самырык вӱдышӧ, Олык Ипай лӱмеш Кугыжаныш премийын лауреатше Виктория Мамаеван йӱкшым чӱчкыдын колыда. Тудо «Ямде лийын» чолга юнкоржо лийын. Сылнымутышко, журналист корнышко икымше ошкылым ышташ йоча газет полшен.
Викан изаже, Виталий, газет дене пеҥгыде кылым кучен. Тудын ятыр ийлан кугу улмыжлан кӧра «Ямде лийым» пырля лудын шуктен огытыл гынат, изажын юнкор слётышко мийымыж нерген каласкалымыже ӱдырын ушешыже курымешлан кодын. Викан возаш кумылжо эре лийын, но кокытеланен.
Икана «Кугарня» газетыште тиде чолга марий ӱдырын лӱмжым ужынам. Тушко кугу статьям серен ыле. Вигак йодыш шочын: «Ямде лийышке» молан огеш возо?» Викториялан серенам веле, тунамак «Келшымаш» почеламутшым колтен, вара – «Йывансола», «Пырысем» да молат. Икмыняр жап гыч шочмо йылме, калык, пӱртӱс да моло нерген заметке-влак дене куандарен.
– Иктаж-мом сайын ыштен моштенам гынат, пашамым калык ончык лукташ, конкурсышко колташ ала ӧрмалгенам, ала огеш лек манын шоненам. Мыланем эре шӱкалтыш кӱлын. «Кугарняшкат», «Ямде лийышкат» йодмо почеш веле возаш тӱҥалынам, – ойла ӱдыр.
Викториян сылнымутшо кажне у пашаж дене вияҥын. Лектыш лийын – 2018 ийыште З.Е.Яковлева лӱмеш премийын лауреатше лӱмым налын. Чолга улмыжлан кӧра «Ямде лийын» икымше лаштыкышкыже логалашат йӧн лектын. Тиде татым ӱдыр шыргыжалын шарналтыш:
– Тиде мыланем кугу пиал лийын. Ме «Мурсескем» ансамбль дене Саратов олаш миенна. Мӧҥгӧ толмо годым, яндар юж дене шӱлалташ шогалмеке, йолвургышкем пудий пызен улмаш. Пӧртылмеке, газетлан фотом ышташ кӱлын. Школ формым чиен, пӱртӱс лоҥгашке лекташ тарванышым. Пудийым ужмеке, лӱдмем дене, ушым йомдарен, диванышке камвозым.
Виктория кызыт Марий кугыжаныш университетыште марий йылмым да литературым, тӱҥалтыш класслам туныктышо лияш ямдылалтеш. Кӱшыл шинчымашым налмеке, школышко пашаш пура гын, юнкор кружокым почаш шона. Йоча-влакым «Ямде лий» дене кылым кучаш кумылаҥдынеже.
