1-11-ше класслаште тунемше-влак коклаште «Память и гордость в сердцах поколений» районысо шымлыме паша конкурс Морко посёлкышто эртаралтын. Таҥасымашке 13 школ гыч ӱдыр-рвезе-шамыч ушненыт. Арын школышто 4-ше классыште тунемше Артём Сергеев «Герои – в названии улиц» таҥасыш ушнен да шымлыме пашаж дене икымше верыш лектын. Артём Совет Ушем Герой В.В.Соловьёвын илыш корныжым шымлен. Тудын лӱмжым нумалше уремла, мемориал оҥа, бюст дене палдарен, герой дене кылдалтше уверлам поген.
Йоча-влакым тӱрлӧ конкурсыш ушнаш туныктышо Олимпиада Алексеевна Васильева кумылаҥда.
– Артём уш-акылжым, мастарлыкшым тӱрлӧ таҥасымаште терга. Сайын ямдылалтеш, садлан лектышыжат куандарыше. Ой-каҥашымат вигак умыла да выступатлымыж годым шотыш налеш. Артём тыгак почеламутым сылнын лудеш. Конкурслаште шке таҥашыже-влак коклаште эре сеҥыше радамышке лектеш, – ойла О.А.Васильева.
Рвезылан марий да руш йылмыла, математике, ИЗО, труд предмет-влак поснак келшат. Артёмлан умбакыжымат тыгаяк чолга лияш да кугу кӱкшытыш шуаш тыланена.
Оля МАЙКОВА.
Фотом еш альбом гыч налме.
