Ече – айдемым чыла могырымат шуарыше спортын видше. Кугу сеҥымашыш шуаш шонышо
спортсмен-влак идалык мучко тренировкым эртарат. Тунам лектыш куандарыше лиеш. Тиддене Кужэҥер район Коҥганур кыдалаш школышто 7-ше классыште тунемше Валерия Шутылева (снимкыште ечызе Савелий Коростелёв дене пырля) келша да шке примерже дене пеҥгыдемда. Самырык ечызе 2024-2025-ше ийласе ече сезоным иктешлыме почеш Марий Эл Республикыште иктаҥашыже-влак коклаште эн виянлан шотлалтеш.
– Физкультур урок мыланем эре келшен. Утларакше ече дене кошташ йӧратенам. Садланак кумшо классыште тунеммем годым школысо ече кружокыш ушненам. Вячеслав Степанович Еменгулов моштен тренироватлаш тӱҥалын. Кызытат тудо мыйын тренерем улеш да у ече сезонлан ямдылалташ полша, – ойла Валерия.
Ӱдыр тренировкылан кугу верым ойыра. Спорт илышыже тӱрлӧ кундемыш миен толаш йӧным
ышта. Тений кеҥежым Беларуссийыште лийын. Марий Эл гыч самырык спортсмен-влак Раубичи
спорт рӱдерыште вий-куатыштым шуареныт.
«Кок арня жапыште ечероллер дене кудалыштынна, тӱрлӧ упражненийым ыштенна. Рӱдерыште капкылым вияҥдаш чыла йӧн уло», – палдара спортсменке.
Тӱҥ таҥасымаш-шамыч лум вочмеке тӱҥалыт гынат, Валериян канаш жапше уке. Шукерте огыл ечероллер дене Марий Эл Республикысе первенствыште сеҥышыш лектын.
– Еш да тренерем деч посна ик сеҥымашат ок лий ыле. Ача-авам мыланем моткоч ӱшанат да вияҥаш йӧным ыштат. Тыгак Толя чӱчӱэм да спонсор Александр Орлов полшат: спорт инвентарьым наледат да поро мутышт дене у сеҥымашлан ӱшаным пуат, – ойла чолга ечызе.
Катя СЕРГЕЕВА.
Фотом еш архив гыч налме.
