«Идалыкын ешыже» всероссийский конкурсым иктешленыт. Марий Элын чапшым Йошкар-Ола воктенысе Семёновко села гыч Смирновмыт еш арален да «Шуко шочшан еш» таҥасыште сеҥышыш лектын. Ача Никита Александрович – бачышка, ава Светлана Николаевна – архитектор, шанче кандидат. Нуно 15 ий келшен илат, куд икшывышт уло. Елисей, Иоанна, Мария школышто «визытанлан» тунемыт, олимпиадылаште да конкурслаште уш-акылыштым тергат да мастарлыкыштым ончыктат. Тыгак музыкальный школыш коштыт да тӱрлӧ семӱзгар дене шоктат. Изирак икшыве-влакат чолга лияш тыршат.
– Ме йоча-влакын чонышкышт йӧратымашым шыҥдараш тыршена. Кеч-могай пашам икте-весе дене каҥашен да пырля ыштена. Ойгым пырля сеҥен лектына. Ешнан девизше – «Пиал – лияш пырля», – ойлат ача-ава.
