Ийготыш шудымо йочам йотэлыш наҥгаяш лиеш мо?
Медведево районысо прокурорын полышкалышыже, юрист А.И.КОВАКИН умылтара:
– Российысе Федеральный закон дене келшышын, ийготыш шудымо йоча йотэлыш ача але ава, опекун, ашнаш налше еҥ дене пырля каен кертеш. Ача але ава тореш лиеш гын, йотэлыш кайыме нерген йодышым суд рашемда.
Йочалан вес элыш каяш йотэллык паспортым ыштыман. Тидлан ача але ава йодмашым возышаш. 14 ийым темыдыме икшывым ачан але аван йотэллык паспортешыже палемдаш лиеш.
Ийготыш шудымо йоча йотэлыш ача-ава деч посна кая гын, пеленже паспорт, ачан але аван, опекунын, ашнаш налше еҥын йотэлыш колташ келшымыже нерген документ лийшаш. Тудым нотариус дене пеҥгыдемдыман. Документеш могай элыш да мыняр жаплан кайымым ончыктыман.
