Редакцийышке У Торъял район гыч Катя Е. деч йодыш пурен: «Мемнан Маркиз пырысна ден Марсик пийна улыт. Нуно келшен илат. Марсик пеш поро. Пуымо кочкышым кочкын ок пытаре. Тидым пырысна шекланен шукта да пийын пыжашышкыже тутло сийым авызлаш пура. Маркиз Марсикын кӱмыжшӧ гыч кочкеш гын, огеш черлане? Моткоч тургыжланем».
Тиде йодышлан вашмутым Марий Эл Республикысе вольык, янлык чер ваштареш кучедалме шотышто станцийын начальникше В.Г.Данилов пуа:
– Мутат уке, илыме верым чӱчкыдын эрыктыман, кӱмыжым эре мушман. Шуршо да сӧсан деч кум тылзылан ик гана эмым йӱктыман. Ветеринарын темлыме прививкым жапыштыже ыштыктыман. Маркиз тыге тунемын гын, тудлан чаракым ышташ йӧсӧ. Нине ой-каҥаш-влакым шотыш налаш гын, пырыс пий вашакым кочкын кертеш, ок черлане.
– Владимир Геннадьевич, ныл йолан йолташ-влак пагар, шолора дене кылдалтше чер-шамыч дене чӱчкыдын черланат?
– Кочкыш сай качестван, лӱдыкшыдымӧ лиеш гын, чер шагал годым вашлиялтеш. Ийготым шотыш налын пукшыман. Кунар самырыкрак улыт, тунар чӱчкыдынрак черланат. Йоча-влак пий ден пырысым модышлан шотлат. Йолташым суртыш илаш конденда гын, тудын илышыжлан да тазалыкшылан мутым кучыман.
– Пий ден пырысым мо дене сийлыман?
– Рушла каласаш гын, нуно хищник улыт. Шылым кочкаш йӧратат. Тыгак колым, шӧрым пукшыман. Шӱраш денат сийлыман. Локтылалтше кочкышым темлаш ок лий.
Х.АЛЕКСАНДРОВА.
Фотом станцийын архивше гыч налме.
