15 июльышто У Торъял посёлкышто «Творцы и хранители» регион-влак кокласе фестиваль кудымшо гана эртаралтын. Тушко Марий Эл да пошкудо Чуваш республикла гыч 30 утла еш ден родо-тукым ансамбль ушнен. Мыланем «Детки и предки» фотоончер утларак келшен. Уна-шамычым «Еш пушеҥге», «Национальный кочкыш» таҥас-влак куандареныт. У Торъял район Немда гыч Садовинмытын вич тукымышт (снимкыште) могай мастар улыт! Ончерыш пидме арверлам, шер пырче дене тӱрлымӧ ӱзгарлам ак-лаш луктыныт, тӱрлӧ марий кочкыш дене сийленыт. Умбакыже пайрем Тӱвыра пӧртыштӧ гӱжлен. Тушто ансамбль-влак еш йӱлам да тӱрлӧ пайремым эртарыме нерген палдареныт. Гран-прим Звенигово район Юлъял тӱвыра пӧрт пеленысе «Маска тавраш» еш ансамбль (вуйлатыше – А.Г.Мартынов) сеҥен налын. Тыгодымак тӱҥ площадьыште «Торъяльский Fordson» шымше фестиваль эртаралтын. Тушто ретро машина ончер пашам ыштен.
