Российыште 200 наре тӱрлӧ калык келшен, ваш эҥертен, полшен ила. Кажныжын – ойыртемалтше тӱвыраже да йылмыже, эртыме корныжо. Туге гынат нуным Шочмо эл – Россий – иквереш уша. Тудын волгыдо ончыкылыкшо верч тыршымаш – кажнын порысшо.
Россий Президент Владимир Путин 2026 ийым Российысе калык-влакын икоян улмо идалык семын увертараш темлыме дене келшен. Кок у пайрем нерген пунчалыш кидпалым пыштен. Шушаш ий гыч 30 апрельыште Российысе изи чотан тӱп калык-влакын кечыштым, 8 сентябрьыште Россий калык-влакын йылмышт кечым палемдаш тӱҥалына.
Икте-весе кокласе кыл вияҥмылан кундемыштынат кугу тӱткыш ойыралтеш. «Россий калык-влакын ассамблейыштын» верысе пӧлкаже Йошкар-Оласе 32-шо номеран школышто «Герои моего народа» республикысе шымлыме паша конференцийым шукерте огыл эртарен. Тушко 10 тӱрлӧ калыкын икшывыже-шамыч ушненыт, геройышт дене палдареныт. Конференций кышкарыште Йошкар-Оласе Российысе сарзе-патриот ушемын «Герои и подвиги» куснылшо ончержым, «Жена Героя. Мать Героя» выставкым почыныт. Нуно СВО-н участникше-шамычлан, авашт ден пелашыштлан да Кугу Ачамланде сарын ветеранже-влаклан пӧлеклалтыныт.
Оля МАЙКОВА.
Иван Речкинын фотожо.
