17 февральыште Марий Эл Республикыште Россий калык-влакын икоян улмо идалыкым торжественно почмылан пӧлеклалтше пайрем Э.Сапаев лӱмеш Марий кугыжаныш опер да балет академический театрыште эртаралтын (снимкыште). Тушто Марий Элым Вуйлатыше Юрий Зайцев лийын.
– Россий Президент Владимир Владимирович Путин Москваште ты идалыкым почмо годым Россий кугыжанысе тӱрлӧ калыкын тукым гыч тукымыш келшен, шочмо мландым, тӱвырам, йӱлам арален илымыже нерген палемден. Марий Элыштат тыгаяк шӱлыш озалана. Марий мландыште витле утла тӱрлӧ калык икте-весым пагален, илыш-йӱлам, йылмым аклен да жаплен вияҥеш, – ойлен Юрий Зайцев.
Марий Элым Вуйлатыше пайремыште кугыжаныш наградевлакым кучыктен. Всемарийский йоча хор, «Волгенче» йоча куштышо ансамбль да моло артист-влак усталыкыштым ончыктеныт. Республик Вуйлатыше деч изи артист-шамыч шере пӧлекым налыныт.
Марий Эл Вуйлатышын пресс-службыжын уверже негызеш
Людмила ГРИГОРЬЕВА ямдылен.
Марий Эл Вуйлатышын пресс-службыжын фотожо.
