Икымше фотокорреспондент

«Кугарня» газетын фотокорреспондентше, У Торъял район Шавыксола ялын шочшыжо И.Речкиным республикыште кӧ огеш пале?! Кажне олаште, ялыште да селаште лийын, очыни. Тудын дене шинчаваш мутланышна.

– Иван Никандрович, «Ямде лийышке» пашаш толмо икымше кечым шарнеда?

– 1978 ий, шыже. Марий кугыжаныш университетыште занятийыште шинчена. Юрий Владимирович Анду-гановын лекцийже ыле. Ала-кӧ омсам пералтыш. Тиде Алексей Михайлович Юзыкайн улмаш. Пурыш да мыйым йодо. Коридорышко лекна, да тудо фотокорреспондентлан пашаш пураш темлыш. Алексей Михайлович дене пырля редакцийышке кайышна. Тыге мый «Ямде лий» газет редакцийын налме икымше официальный фотокорреспондент-ше лийым. «Киев-4» фотоаппарат дене пашам ышташ тӱҥальым.

– Пашам ыштыме годым могай оҥай случайлашке логалаш пернен?

– «Ямде лийыш» кумдан палыме ятыр еҥ толеш ыле: Александр Юзыкайн, Макс Майн, Миклай Казаков, Борис Данилов, Михаил Калашников да молат. Тунам редакций Йошар-Оласе Волков уремысе 141-ше номеран пӧртыштӧ верланен ыле. Икана подвалыште верланыше фотолабораторийыште фотом печатлымем годым ала-кӧ омсам кроп почо. Тиде лабораторийын ончычсо озаже Николай Ва-сильевич Кожаев лийын улмаш. «Тый кӧ улат?» – йодо. «Иван Речкин. Фотокорреспондент», – вашештышым. «Молан увеличительым йодде кучылтат?» – кугу йӱкын пелештыш. Лыпланымекше каласкалаш тӱҥале: «Мый тидын дене Совет Ушемын Маршалже Семён Михайлович Будённыйым печатленам. Фото дене Германийыште шӧртньӧ медальым сеҥен налынам».

– Южо еҥ-влак фотом смартфонышто, компьютерыште ончаш огыт йӧрате, садлан печатлен луктыт. Тудо ынже локтылалт манын, кузе аралыман?

– Эн тӱҥжӧ – сай фотографлан ӱшаныман. Шукынжо лабораторийысе фотом огыт ыште. Тыглай принтер гоч луктыт. Вӱдан чия дене шыжыктыме фото пеш писын локтылалтеш. Тидым умылаш манын, таҥастарен ончаш темлем. Фотолабо-раторийыште печатлен ончыза, вара принтер гоч луктыктыктыза. Кудыжо писынрак ошемеш, шке ужыда. Сай фотографийлан оксам чаманыман огыл. Фотом альбомышто аралыман, кече логалшаш огыл.

– Ой-каҥашланда тау. Тидым лудшына-влакат шотыш налыт манын ӱшанем.