«Образование» нацпроектын «Современная школа» регионысо проектше почеш Йошкар-Оласе Бауман лицейыште «Кванториум» йоча технопарк почылтшаш. Марий Элыште – икымше! Тидлан 21,4 миллион теҥгем ойырымо. Кызыт ноутбукым, 3D-принтерым, микроскопым, «Умная теплица» наборым да молым налыныт. Тылеч посна биологийым, физиологийым, химийым, физикым келгынрак тунемаш цифровой лабораторийым, интерактивный панельым, фрезер станокым, робототехнике дене наборым пуат.
Марий Эл Республикысе образований да науко министерствын уверже почеш, лицейыште куд кабинетым олмыкташ тӱҥалме. Тушан робототехнике, хай-тек, биотехнологий дене лабораторий-влакым вераҥдат. Айти-квантумым почаш шонат.
Кванториумысо физике, химий, биологий дене занятийлашке республикысе школла гыч тунемше-влак ушнен кертыт.
