Илыш корныш луктын

«Ямде лий» газет дене 3-шо класс гыч кылым кучаш тӱҥалынам. Икымше гана тушко ныл корнан «Шӱшпык» почеламутем колтенам да чон пырткен шуматкечым вученам. Почтальонко Ирина акай мыланем серышым шуялтен. Тудо редакций пашаеҥ В.Б.Исенеков деч лийын: «Елена, кумылет ынже воло, но почеламутетым савыктен огына керт. Ритм да рифме нерген кугырак-влак деч йод, тунем, умбакыжат возен шого». Кумылем волен гынат, «Ямде лий» дене кылым кучымым чарнен омыл. Школ илышем, йолташем-шамыч нерген заметкылам возаш тӱҥалынам. Пырля тунемме ӱдыр-рвезе-влак дене ӱчашен-ӱчашен возымо. 1982 ийыште «Ямде лий» газетын чолга юнкоржо семын «Артек» пионер лагерьыш ик тылзылан канаш колтеныт. Тиде пагыт пӱтынь илыш корныштем эн сӧрал жап семын шарналт кодын. Кажне юнкор ончыкыжым возымо пашам ойырен налын огыл гынат, «Ямде лийын» пуымо урокшо илышыште эре кӱлешан да пайдале лийын. Ме марий йылмым эшеат чот йӧраташ, пагалаш да аклаш, келшен илаш, тунеммаште да пашаште ончылно лияш тунемынна.

Е.НЕСТЕРЕНКО.