«Об образовании в РФ» законыш тӧрлатымаш-влакым пуртымо. Нуно 2022 ий 1 сентябрь гыч илышыш шыҥдаралтыныт. Вашталтыш-влак тунеммаште веле огыл палдырнат. Йоча-влакым патриотизм шӱлышеш вияҥдымашлан кугу тӱткыш ойыралтеш. Тидлан туныктышо, тунемше да ача-ава-влак ямде лийшаш улыт.
Уэш тисте лойга
Йоча-влак, ты гана Шинчымаш кече пайремда ойыртемалтшын эртыш, очыни: Кугыжаныш тистым нӧлтышт да Кугыжаныш гимным йоҥгалтарышт. Тыге ончыкыжым каныш кече деч вара кажне у тунемме арням вашлийыда. Кугыжаныш пайремым, тӱрлӧ таҥасымашым, конкурсым тыгак эртареда. Сандене гимнын шомакшым наизусть тунемза.
Уэмдыме ФГОС
Федеральный кугыжаныш тунемме стандарт (ФГОС) почеш шинчымашым практикыште кучылт моштымашлан кугу тӱткыш ойыралтеш. Изирак класслаште тунемше-влакын программышкышт финанс грамотность ешаралтеш. Ача-ава-влакын йодмашыштым шотыш налын, икшыве кокымшо йот йылмым тунемын кертеш. Икмыняр предмет дене базовый да келге шинчымашым пуаш тӱҥалыт.
Икымше класс гыч – историй
ФГОС-ышто ик эн тӱҥ вашталтыш – икымше классын тунемме программышкыже историй дене теме-влакым пуртымаш. Изирак ийготан-влаклан Российын историйже дене посна урок ок лий. «Окружающий мир» да «Основы религии и светской этики» уроклаш историй дене кылдалтше теме-влакым пуртат. Тоштерлаш да ончерлаш кошташ тӱҥалыт.
10-11-ше класслаште тунемше-влаклан «Россия в мире» ужашыш «Россия – моя история» курсым ешарат.
Мо тыгай киноурок?
Российыште «Киноурок-влак» проектым илышыш шыҥдарыме. Тӱрлӧ ийготан йоча-влаклан келшыше 42 кином сниматлыме. 1 сентябрь гыч школлаште киноурок-влак эртаралтыт. Тушто йоча-шамыч художественный да документальный кино-влакым ончат да лончылат.
«Эн кӱлешан нерген мутланымаш»
Тыге лӱмденыт у тунемме ийыште эртаралтшаш класс шагат-влакым. Туныктышо-влак йоча-шамыч дене мер-политик илыш нерген мутланаш, самырык тукымым тургыжландарыше йодыш-влакым радамлаш тӱҥалыт.
Ешартыш шинчымаш
Искусственный интеллект дене урокым 3-11-ше класс-влакын тунемме программышкышт пуртат. Кызытеш Российын 70 регионжо гыч школ-шамыч проектыш ушненыт. Туныктышо-влак шинчымашыштым курсышто ешарен кертыт.
8-11-ше класслаште тунемше ӱдыр-рвезе-влаклан искусственный интеллект дене всероссийский олимпиадыште уш-акылыштым тергаш йӧн пуалтеш. 1 сентябрьыште регистраций тӱҥалын.
Информатикылан шӱман кугурак класслаште тунемше-влак программирований дене кокияш курсым яра эртен кертыт.
Иктешлыше сочинений
11-ше классыште тунемше-влаклан сочинений теме визыт огыл, а кудыт лиеш. Кажне ужашыште: «Духовно-нравственные ориентиры в жизни человека», «Семья, общество, Отечество в жизни человека» да «Природа и культура в жизни человека» – кок теме дене.
