Мый Йошкар-Олаште илем. 1-ше номеран школышто тунемам. 7-ше классыш вонченам. Сылне кеҥеж канышым ялыште эртараш йӧратем. Ковам Советский район Кельмаксолаште ила. Тушко уло еш дене унала коштына. Мийымына годым мемнам эре куанен вашлиеш. Тиде мотор вершӧрыштӧ ӱжара пеш сылнын нӧлтеш. Уремыште кажне кастене гармонь йӱк шергылтеш. Мыят семӱзгарым шокташ кумылаҥынам. Изиш шупшкедылам. Икмыняр семым шоктен моштем.
Ковамын пеш кугу пакчаже уло. Мом гына огеш шынде! Шотленат от пытаре. Ме кертмына семын полшена. Тыгак чывым ашна. Мыланна муным пукша. Ялыште илаш да каналташ пеш келша. Яндар южышто куржталына, модына. Мемнам эше ныл йолан йолташна куандара. Тиде – шоҥшо. Пӱсӧ иман, шер гай шинчан. Южгунам мундыра гай пӱтырналт возеш. Изи гынат, пеш чулым. Шошым шылеш ыле. Кызыт лӱдмым чарнен. Кочкышым веле вуча. Шашлыкым моткоч йӧрата. Тудым ужмеке, чылан куанена. Ӱмаштат ик тыгай «иман уна» илен. Тений кугурак. Можыч, тудак толын. Лӱмым пуаш шонена. Келшышыже але лектын огыл. Ёжик манына. Тек шоҥшо вес ганат толеш. Ме тудым вучаш тӱҥалына.
Иван КОЖЕВНИКОВ.
