Искусственный интеллект, нейросеть. Нине шомак-влакым пытартыш жапыште чӱчкыдын колына да тӱрлӧ вере возымым ужына. Школышто тунемше-влакат тудден пайдаланаш тӱналыныт. Мутлан, докладым ямдылыме, проектым возымо годым полышкалыше семын кучылтыт. Пытартыш жапыште искусственный интеллект дене кылдалтше конкурс-шамычымат эртарат.
Пайдаже ятыр
Тунемше тудым кузе пайдалын кучылт кертеш? Ты йодышлан вашмутым Волжск олаште йоча-шамычлан цифровой образованийым пуышо «IT-куб» рӱдерын педагогшо В.А.Фомина пуа:
– Искусственный интеллект тунемшын ойыртемжым лончылен, мом вияндаш кӱлмым умылен, келшыше материал ден заданийым темлен кертеш. Йоча иктаж-могай йодышлан вашмутым писын мунеже гын, искусственный интеллектлан энертен, уверым вигак верешт кертеш. Искусственный интеллект полшымо дене виртуал лабораторийым але симуляторым ышташ да экспериментым лӱдыкшыдымын эртараш лиеш. Тиде химийым, физикым келгын тунемаш шонышо-влаклан поснак пайдале. Южо системе тунемшын текстшым, йӱкандыме увержым, онлайн кумдыкышто шкенжым кузе кучымыжым эскерен, иктешлымашым ыштен, сай ой-канашым темла. Искусственный интеллектым тӱрлӧ йылме гыч текстым писын кусараш кӱлмӧ годым кучылташ лиеш. Тыгак йот йылмым тунеммаште полшен кертеш. Проект пашам возымо годым у шонымашым «пӧлекла». Искусственный интеллект кечым чын радамлаш, планым, расписанийым ышташ полша. Икманаш, пайдаже шуко. Чын кучылт веле моштыман!
Школлаште информатике урокышто искусственный интеллект дене пайдаланаш туныктат манын колынам, чынак мо? Ты йодышым рашемдаш Морко район Коркатово лицейыште директорын сомылжым жаплан шуктышо, информатикым туныктышо А.В.Анисимов дене кылым ыштышым.
– Искусственный интеллектым информатике урокышто ынде кок ий кучылтына. Сӱретлаш, текстым возаш полшышо сервисла дене пайдаланена. Йоча-влак тек изинек илыш дене тӧр ошкылыт да у технологий деч пайдам налын мошташ тунемыт, – ойла Александр Васильевич.
Энгекымат ышта
Искусственный интеллектын уда шӧрынжат уло. Ты шотышто Йошкар-Ола гыч психолог, гештальт-терапевт Л.В.Каяткина дене мутланышна.
– Любовь Вячеславовна, искусственный интеллект йочалан энгекымат ыштен кертеш, туге?
– Искусственный интеллект кеч-могай ушан гынат, айдемым нигунам тӱрыс огеш алмаште. Тудын кумылжо, шижмашыже уке. Кеч йоча, кеч кугыен искусственный интеллект гоч тӱрлӧ йодышлан вашмутым кычалаш тӱналеш гын, шке гыч шонымым чарна, вуйдорыкшо начаррак пашам ышта. Искусственный интеллект йонылыш уверымат пуа. Йоча тудлан ӱшана. Шояк уверым возен налын, йӧндымӧ да лӱдыкшӧ ситуацийыш логалын кертеш.
Икшыве-влак искусственный интеллектым пайдалын кучылтышт манын, ача-ава, туныктышо-шамыч умылтарышаш, туныктышаш улыт.
– Интернетыште тыге возымым ужым: «Искусственный интеллектым йолташ, полышкалыше семын аклаш гын, тургыжланымаш иземеш», «йоча шкаланже огеш ӱшане гын, искусственный интеллект дене пайдаланен, шкаланже ӱшаным утыр йомдара».
– Йочан пеленже энерташ йӧршӧ ен уке гын, икшывылан тӱрлӧ неле ситуацийыште ой-канашым йодаш нигӧ деч. Тыгай годым искусственный интеллект полшен кертеш. Но ача-ава-влак шочшыштым шижын моштышаш, умылышаш улыт. Икшыват кугыенлан энерташ аптыранышаш огыл. Тидлан тудым туныктыман. Йоча йодыш дене лишемеш гын, тудым шӱкалман огыл, кертме семын полшыман, чоным почын мутланаш кумыландыман. Вет искусственный интеллектын чонжо уке. Айдеме неле годым шыматен, поро мутым каласен кертеш. Йоча шкаланже огеш ӱшане гын, искусственный интеллект тыгай шижмашым пуэн ок керт. Тудо йодыш-влаклан вашмутым гына пуа. Тыгодым икшыве шкаланже ӱшанаш огеш тунем. А кунам йоча пелен вес ен уло да «ынде тый шке ыштен ончо, а мый пеленет лиям», «тыланет ӱшанем», «чыла сай лиеш, мый тыштак улам» манеш, тунам йоча шкаланже утларак ӱшанаш тӱналеш. Вескана шкетын лиеш гынат, ӱшаным ок йомдаре.
Христина АЛЕКСАНДРОВА мутланен.
Фото-влакым еш архивла гыч налме.
