Морко посёлкысо 6-шо №-ан школ пеленысе тоштерым самырык-влакым патриотизм шӱлыш деке шӱмаҥдыше рӱдер манаш лиеш. П.И.Курсов лӱмеш Боевой Чап музейым 2005 ийыште Сеҥымашын 60 ияш лӱмгечыже вашеш почыныт. Вуйлатышыже – А.Л.ПАУТКИН.
– Тоштерым чумыраш 2003 ийыште Павел Ильич Курсов полшен. Тудо 129-ше Орловский Краснознаменный стрелковый дивизий нерген 200 утла буклетым, фото, серыш-влакым школлан пуэн. Ты дивизийыште лийше салтак-влакын Кугу Ачамланде сарысе геройло подвигышт нерген чын материал-влак война годсо илышым раш почын пуат. Ятыр экспонатым ме кадет-влак дене пырля погенна. Герой-влакын родо-тукымышт деч серышыштым, документыштым йодыштын, тоштерыш вераҥдыме. Гранат, осколко-влак – чыла сар пасу гыч улыт, – ойла Анатолий Логинович. – «Демос», «Воскресение» кычалше отряд-влак дене пеҥгыде кылым кучена. «Бессмертный полк», «Вахта памяти», «Правнуки победителей», «Помним каждого» да моло акцийлашке кажне ийын лектына. Шукерте огыл РДШ толкын дене «Я познаю Россию» турист да краеведений всероссийский экспедицийыш ушненна.
Йоча-влакым изинек патриот шӱлышаным куштымо верч вуйлатыше чот тырша. Музейыште патырлык урокым эртарат, ончерым чумырат. Тоштер пеленак «Самырык краевед», «Мый патриот улам» ушем-влак, «Поиск» кружок талын пашам ышта. Ӱдыр-рвезе-влак «Поиск. Находки. Открытия», «Дорога к Обелиску» всероссийский конкурслашке ушненыт. Юл кундемысе федерал округышто эртаралтше «Лучший школьный музей Боевой Славы» конкурсышто тоштерышт кок гана сеҥыше лийын. Самырык патриот-влак теорийым кружок, занятийыште налыт гын, практикым шымлымаш, кычалме паша дене пеҥгыдемдат.
Тоштерысе экспозиций-влакым куд ужашлан шелме. Нуно ий гыч ийыш ешаралтыт.
129-ше Орловский Краснознаменный стрелковый дивизийын сар корныжо. 2003 ий 9 майыште почмо.
«Салтакын подвигше – калыкын подвигше», «Нигӧ ок мондалт, нимо ок мондалт». 2005 ий 6 май.
«Кугу Ачамланде сарын историйже». 2008 ий 8 май.
«Афган – мемнан шарнымаш. Чечня – мемнан корштыш». 2010 ий.
«Вахта памяти» – «Демос» кычалше отрядын пашаже.
«Бесланысе герой-влак». 2017 ийыште школ ончылно оҥам почмо.
