Иван огыл – Йыван

Марий Элын 100 ияш лӱмгечыжлан чылан ямдылалтыт. Серызе-влак шочмо кундемыштлан пӧлеклалтше почеламутым, ойлымашым, повестьым, пьесым возат, сӱретче-влак сӱретлат, мурызо-влак у мурым луктыт, а режиссёр-влак фильмлан сценарийым возат да войзат. Шернур кундемын шочшыжо, режиссёр Денис Шаблий «Не Иван, или Как приручить богатыря» лӱман фильмым сниматлаш ямдылалтеш. «Тиде фильмыште подростко-влакын проблемышт, йоча да ача-ава-влак кокласе кыл, икымше йӧратымаш йодыш-влакым тарватена. Самырык еҥ-влак трендыште лияш тыршат, а шочмо калыкыштын тӱвырашт нерген мондат. Тиде йодышат фильмыште ончыл верыш лектеш», – ойла Денис.

Мо нерген ойлалтеш?
Тӱҥ герой Йыван ял гыч Йошкар-Оласе школыш тунемаш толеш. Тудын ача-аваже марий улыт. Йыванын марий улмыжым, кутырымыжым шке таҥашыже-влак воштылыт. Тыглай огыл лӱмжат оласе йоча-влаклан игылташ амалым ышта. Йыван коваж дене гына чон почын кутыра. Коважлан ялыш йыҥгырта да илышыж нерген каласкала. Тудо, изи рвезым лыпландараш манын, Онар патыр нерген легендым каласкала.

Икана рвезе Онар деч полышым йодеш. Но патыр ок тол. Коважлан йыҥгырта. «Онар пӱтынь марий калыкым арала гын, молан мыйым ок арале?» – шона рвезе. Тылеч вара марий улмыж деч кораҥеш да моло йоча-влак гай лияш шонен пышта. Умбакыже мо лийын, кином ончымеке пален налына.

Кастинг

Март тылзыште М.Шкетан лӱмеш Марий национальный драме театрыште фильмыште войзалташ кастинг эртен. Чылаже 50 утла еҥ погынен. Тушко артист да тыглай еҥ-влак ушненыт. Тыгай роль-влак улыт: Йыван (12-16 ияш, лапкарак капан), Егор (12-18 ияш, уда койыш-шоктышан), Андрей (14-20 ияш, кужу капан, пеҥгыде капкылан), Настя (12-18 ияш), Егорын йолташыже-влак (12-18 ияш, осал койыш-шоктышан), Йыванын коваже (70 ияш). Тылеч посна Егорын «полышкалышыже», туныктышо, школ пашаеҥ да моло йоча-влак.
Кастинг эше умбакыже шуйна. Тушко онлайн йӧн дене ушнаш лиеш.

Кастингыште Шернур посёлкысо 1-ше номеран школын 8-ше классыште тунемшыже Дима Веденькин (снимкыште – шолаште) лийын.

– Ме тушто мастарлыкнам ончыктенна. Фильм гыч кӱчык ужашым, тӱрлӧ геройын рольыштым модын ончыктенна. Шернур кундем гыч нылытын лийынна. Фильмышке логалын огынал гынат, кумылна волен огыл. Ала вес фильмыште модаш пиал шыргыжалеш.

 

  • Related Posts

    Еш – кумда сандалык

    Звенигово район гыч Толстовмыт еш (снимкыште) нерген иктаж уверым колам але лудам гын, шинча ончылнем эн ончыч изи Полина сӱретлалтеш. 2019 ийыште «Изи поҥгызо» конкурсыш ушнымо фотожо тачат ушыштем. Ӱдыр…

    Салам, пырыс ден кок кролик!

    Sanrio япон компаний тӱнялан шуко оҥай персонажым пӧлеклен. Герой-влакын сӱретыштым вургемым, канцелярий да шуко вес арверым ыштымаште кучылтыт. Hello Kitty, Мелоди ден Куроми поснак ойыртемалтыныт. Hello Kitty – ош пырыс,…