– У спектакльлан негызым «Кырла 111» проект ыштен. Тыгодым Испаний, Германий, Франций да моло эллаште илыше студент-влак Йыван Кырлан «Шочмо кече» почеламутшым шке йылмышт дене лудыныт. Тылеч вара иза-шольо калык-влак нерген спектакльым шындаш шонымаш шочын, – ойла спектакльын режиссёржо Степан Пектеев.
Сюжет почеш, самырык студент-антрополог тӱнямбал йылме лагерьышке логалеш. Спектакльыште артист-влак шым – марий, финн, итальян, испан, немыч, француз, англичан – йылме дене мутланат. Тӱрлӧ калыкын илышыже, тӱвыраже дене палыме лияш, йылмым тунемаш манын, артист-влак йот-элласе студент-влак дене вашкылым ыштеныт. Марий чодырашке миен, лагерь илышын могай лийшашыжым рашемденыт.
Тиде спектакль самырык тукымым чолгарак лияш кумылаҥда, туныкта. Тӱнямбалсе тӱрлӧ кундемым ужын кошташ, тусо илыш ойыртем дене палыме лияш, кӱлешанжым шкалан налын, шочмо кундемыш пӧртылын, шке калыклан палдараш тарата. Вет тидлан илышыште нимогай чек уке. Лач айдемын кумылжо гына лийже.
М.Шкетан лӱмеш Марий национальный драме театрын артистше-влак «Folks» у спектакльым калык ончыко 25 апрельыште луктыт.
