Тыге ойлаш лиеш Морко район Нурӱмбал школысо «Отчина» команде (снимкыште) нерген. 2023 ийыште 4-ше классыште тунемше ӱдыр-рвезе-влак тыгай командым чумыреныт да «Зарница 2.0» районысо патриот модышыш ушненыт.
– Командым чумырымеке, йоча-влак изи лийыныт гынат, ºрын огытыл, районысо йыжыҥыште кыдалаш группышто иканаште сеҥышыш лектыныт. Тыге «Авангард» сарзе-патриот р¢дерыш икымше гана миенна. Нуным тушто «киндер сюрприз» маныныт, – ойла Нурӱмбал школын советникше Анна Александровна Павлова.
Командым Анна Александровна ден ОБЗР предметым туныктышо Евгений Лазаревич Яковлев ямдылат. Школ полшымо дене йоча-влаклан тӱрлӧ арверым: палаткым, противогазым, кандырам да молымат – наледеныт.
– Тений «Зарница 2.0» модмаш ныл кече эртаралтын. Эн ончыч индивидуальный таҥас-влак лийыныт. Тушто связистна-шамыч икымше верыш лектыныт. Вара команде дене таҥасеныт. Командыште – лу йоча, кажныжын – шке сомылжо. Кумшо кечылан пале лийын: сеҥымаш лишне. Тиде йоча-влакым моткоч кумылаҥден, да пытартыш таҥасымаште, вершӧрыштӧ тактический модмаште, икымше верым налме дене команде сеҥымашыжым пеҥгыдемден, – палдарыш Анна Павлова.
«Отчина» командыште 6-шо классым тунем пытарыше индеш ӱдыр-рвезе да 5-ше класс гыч ик эрге улыт. Кажныже шке сомылжым сайын пала, команде верч тырша. Командирышт – Ильназ Фалзянов. Тудлан Алёша Карпов ден Игнат Демьянов полышкалат. Кызыт икшыве-шамыч российысе модмашке каяш ямдылалтыт.
Катя СЕРГЕЕВА.
Фотом школ архив гыч налме.
