Свердловск область Арти районышто ик марий села – Изи Тавра. Тушто тӱвырам аклат, икте-весе дене шочмо марий йылме дене кутырат, икшывыштым йӱлам жаплен илаш туныктат. Верысе тӱвыра пӧртыштӧ илыш шолеш, марий шӱлышан ятыр мероприятий эртаралтеш. 2023 ийыште «Изи шӱдыр» мурышо да куштышо ансамбльым чумыреныт. Тушко 8-11 ияш 15 наре йоча коштеш.
– Икшыве-шамыч пеш уста, марий койышан улыт. Сылнын мурат, сем почеш кумылын тават. Кажне пайремым шке усталыкышт дене сӧрастарат. Ансамбльыш коштмо шкешамым вияҥдаш, калык нерген утларак пален налаш полша, – ойла ансамбль вуйлатыше Е.С.Мулюкова.
Уста ӱдыр-рвезе-влак (снимкыште) дене Йошкар-Олаште эртаралтше «Ший памаш» регион-влак кокласе фестиваль-конкурсышто ӱмаште палыме лийынна. Шкеныштым пеш мастарын ончыктеныт. Жюри еҥшамыч нунылан вес ийын ты конкурсыш ушнаш сертификатым кучыктеныт.
– Ме тӱрлӧ вере гастроль дене коштына. Арти посёлкышто, Богданович округ Бараба селаште выступатленна. Йошкар-Олаш толмылан поснак йывыртенна. Марий мероприятийыш йылмым палыде ушнаш сӧрал огыл. Трук иктажым каласат, а ме умылен огына шукто. Садлан репетицийыште чылт марла кутыренна. Ача-авана-влакат йылме лывыргылыкым вияҥдаш полшеныт, – каласыш ансамбльын ик участницыже Карина Илюшкина. Ӱдыр Тавра кыдалаш школышто 3-шо классым тунем пытарен. Яра жапыште лудаш кумылан. Айдемым, янлык-влакым, пӱртӱсым сӱретлаш йӧрата.
Оля МАЙКОВА.
Авторын фотожо.
