Поэтессе, Россий писатель ушемын еҥже, Морко район Пектывайсолан ӱдыржӧ Л.Г.ИКСАНОВА 21 декабрьыште 55 ийым тема. Тудын дене мутланымашым лудаш темлена.
– Лидия Геннадьевна, тендам изи годсек «поэт» маныныт. Чоныштыда поэзий кумыл кунам ылыжын?
– Тӱҥалтыш класслаштак «рифмоватленам», очыни. Школышко коштмо деч ончычак лудын-возен моштенам. Ким изам ден Венера акам почеш тунемынам. Икымше почеламутем «Самолёт» маналтын. Тудо школысо пырдыжгазетеш савыкталтын. «Ямде лий» газетыште лекше икымше почеламутем – «Шочмо ял».
– Те «Пачемыш» журналышкат серенда. Мыскараланат шӱман лийында?
– «Пачемыш» журнал пеш оҥай ыле. Тунам «анекдот» умылымаш лийын огыл, векат. Тудым мыскара алмаштен. Журналым чылан налыныт. Йоча-влакат чолган возеныт. Мый пий нерген юморескым возен колтенам. Огыда ӱшане! 7 теҥге гонорар толын.
– Те 32 ий школышто йоча-влак дене пашам ыштеда. ™дыр-рвезе-влакын койыш-шоктышыштым, психологийыштым сайын паледа. Нунылан пӧлеклалтше почеламут-влак возалтыт?
– Йоча-влаклан шукертак возем. Патриотический шӱлышан, аза малтыме почеламутем-влак улыт. Йоча поэме-шамычым серенам. Мутлан, «Ош лудо», «Ансе-лот». Нуно марий мифологий негызеш возалтыныт.
– Театр дене пеҥгыде кылым кучеда. Ятыр спектакльысе мурылан мутым возенда. «Марика» мюзикл сынан йоча пьесыда уло. Тудын дене палдарыза.
– «Марика» – фэнтези сынан йоча музыкальный пьесе. Тушто йоча да подростко-влак кокласе кыл ончыкталтеш. Ялысе рвезе Ямай олаш тунемаш толеш. Оласе икшыве-шамыч оксажым ондален налыт. Нунын коклаште – Марика. Тудын ача-аваже ала-кунам ялыште иленыт, кызыт шкеныштым «оласылан» шотлат. Марика Ямайлан кӧра уда койышыж деч утла. Пьесе келшымаш, паша, ава, марий калык нерген муро-влаклан поян.
– Юнкор-влаклан могай тыланымашда лиеш?
– Мый шкежат «Ямде лий» дене кылым кученам. Пагалыме юнкор-влак, возыза, возыза, возыза! Возымаш пером пӱсемда. Сайын тунемза. Тунемше еҥ гына АЙДЕМЕ лиеш. Шочмо йылмым, шочмо элым, ача-авам йӧратыза. Нуно мемнан шӱм-чон негызна улыт.
