Тачысе кечын ача-ава-влак йочам изинек школлан ямдылат. Олалаште икшывым чыла могырым шуараш тӱрлӧ школ, курс, студий улыт. Тушто изи икшывым лудаш, шотлаш, мураш, кушташ, кидым лывырташ да молыланат туныктат. Психолог, психологий шанче кандидат, доцент Т.Н.ГОЛОВАНОВА (снимкыште) дене мутланенна.
– Татьяна Николаевна, тыгай школ-влак кӱлыт мо?
– Кӱлыт. Ньога-влакым модыш полшымо дене туныкташ келшен толеш. Тыгодым йочан кумылжым ончыман. Икшыве йоча пагытын «тамжым» шижде кодшаш огыл. Тунемаш кумылжо уке гын, ача-ава виеш колтышаш огытыл. Тыгай годым йоча кугу стрессым налын да черланен кертеш.
– Яллаште тыгай йӧн уке. Мӧҥгыштӧ ача-ава да йочасадыште воспитатель-влакын вийышт дене кӱкшытыш шуаш лиеш мо?
– Ача-ава-влак тыгак модыш полшымо дене икшывыштым лудаш, шотлаш, мурым мураш, йот йылмылан туныктен кертыт. Йочасадыште эртармые занятий-влак кугу пайдам пуат. Но оласе специалист-влак шукырак йӧным палат, садлан йочан тӱрлӧ велым вияҥеш. Туге гынат чылажат йочан кумылжо дене кылдалтын.
