Илыш ончыко кайыме дене сылнымутан произведений-влакым лудаш гына огыл, колышташат лиеш. Ӱмаште «ТвоЙО» радион тӱҥ редакторжо Анна Тараткина «ТвоЙО театральное Радио» проектым илышыш шыҥдараш тӱҥалын. Тидын нерген проектын авторжо дене мутланышна.
– Анна, тыгай проектым возаш мо таратен?
– Посёлкышто, олаште илыше самырык еҥ-влак марий йылмым начар палат. Марий сылнымутан произведений-влакым огыт луд. Мый марий сылнымутым шымлаш тӱҥалынам. Тудын дене палыме лият гын, моткоч оҥай, сылне. Кызытсе автор-влакын пашашт шкешотан да виян улыт. Нуным радио-пьесыш савырена. Подкаст-влакым йочасадыште, школышто колыштыкташ лиеш.
– Марий сылнымутым йӱкаҥдаш кӧ полша?
– Командыштына Марий кугыжаныш университетыште журналистлан тунемше, марий йылмым палыше студент, марий да руш йылмылам туныктышо-влак улыт. Мыйын шонымаште, проектлан кӧра нунын профессионал мастарлыкышт кушкеш. Литератур йылме дене возымо произведений-влак йылмыштым пойдарат.
– Радио-пьесыда-влакым рушла да марла колышташ лиеш. Марий произведений-влакым кӧ кусара?
– Ме произведений-влакым огына кусаре. Тиде пеш кугу да неле паша. Ме кок йылме дене савыкталтше сылнымут паша-влакым ойырена. Ӱмаште республикнан 100 ияш лӱмгечыжлан пӧлеклалтше ятыр антологий лектын. Нуным кучылтына.
– Кӧн произведенийжым йӱкаҥденда?
– Валерий Бердинскийын, Анатолий Филипповын, Мария Илибаеван, Светлана Бессонован да моло автор-влакын произведенийыштым лудынна. Ме кызытсе серызе-шамычын пашаштым ойыраш тыршена. Тыгак произведенийын кугытшым, сюжетшым, сылнылыкшым, мыняр герой улмым шотыш налына.
