Виче кундем Малмыж район Кугу Кетек ялыште калык йӱлам, фольклорым арален илат. Тыште тӱвыра да сымыктыш аланыште ятыр ий тыршыше, ялысе клуб вуйлатыше И.А.Кошкинан надырже кугу.
– Школышто пашам ыштымем годым йоча-влакым марий пайрем йӱла дене палдаренам. Куштымашлан, изирак спектакльлан, сценке-влаклан кугурак тӱткышым ойыренам. Йоча-шамыч куштымаш ден сценкыла гоч калык йӱла нерген сайынрак шарнен кодыт, – ойла Ирина Анатольевна. – «Марий Эл» кугыжаныш ансамбльын концертшым ончымеке, ӱдыр-рвезе-влакым кушташ туныкташ кумылаҥынам. Нуным ончен, йоча-влаклан тывырдыкым келыштаренам, номер-шамычым ямдыленам. Тыге 2013 ийыште «Шӱдыр» куштышо ансамбльым (снимкыште) клуб пелен чумыренам.
Клуб пашаеҥ-влак марий калык йӱла-шамычым шымлат, шоҥгыеҥ-влак дене вашлийын, келгынрак па-лен налыт. Погымо материал негызеш сценкым шындат.
– Пайрем йӱлам кажне кундем шке семынже шукта. Мутлан, Угинде пайремым налаш. Мемнан кундемыште ты кечын пӧръеҥ-влак пареҥгым луктыныт. Тудым эҥерыште мушкыныт да озаватыштлан кочкышым ямдылаш конденыт. Ӱстел чесым ямдылымеке, марий вургемым чиен, Юмылан пелештен, пайремлаш тӱҥалыныт. Пайрем кандырам пунен куштымо дене мучашлалтын, – палдара вуйлатыше. – Йоча-влак марий калыкын эртыме корныжым изинек шергалын кушкыт гын, тудо нигунам огеш йом.
