Свердловск кундемыште марий йылмым кузе тунемыт? Тидын нерген Нижнесергинский районысо Ялгиян ялыште верланыше школышто марий йылмым да литератур урокым вӱдышӧ Нина Владимировна КАРМЫШЕВА каласкала:
– Школыштына 40 тунемше уло. Марий йылмым визымше класс гыч тунемына. Школ вуйлатыше С.И.Янбекован тыршымыжлан кӧра марий йылмым ик ий ончыч тунемаш тӱҥалме. Светлана Ильинична шочмо йылмым да йӱлам арален кодымо верч чот тырша. Туныктышо да тунемше-влакым кумылаҥда. Кызыт арняште кок гана марий йылме да ик гана литератур урок-влак улыт. Йоча-влак олимпиадылаште уш-акылыштым тергат. Тӱрлӧ конкурсышко ушнат. Яна Еникеева ден Алёна Беринёва Москосо «Билингва» конкурсышто сеҥыше радамыште лийыныт. Шукерте огыл ты конкурсыш Алёша Обожинын да Влада Камаеван пашаштым колтымо. Ӱдыр-рвезе-влак сочиненийым марла возеныт да рушлаш кусареныт. Регион-влак кокласе олимпиадыште Мария Саркеева марий литератур дене уш-акылжым терген. Урокышто тыгак мураш, кушташ тунемына, почеламутым лудына. Школышто «Изи памаш» мурышо да куштышо ансамбльым чумырымо. Тӱрлӧ конкурслаште мастарлыкнам ончыктена. Антон Калинин «Моя Родина – Урал» фестивальыште сеҥыше лийын. Кажне ийын марий йӱла дене кылдалтше мероприятий-влакым ямдылена. Пеледыш пайрем, Шорыкйол, Ӱярня пайрем-влакым эртарымаш йӱлаш пурен. Йоча-влак уло кумылын ушнат.
