«Йӱштӧ кугызалан серыш» конкурсышко тӱрлӧ ийготан ӱдыр-рвезе-влак ушненыт. Изирак ийготан-влак коклаште Софья ЯКОВЛЕВАН (Советский, Роҥго) серышыже эн оҥай лийын. Матвей САДОВИН (Оршанке, Кугунур) 10-12 ияш-влак коклаште ойыртемалтын. Тудым снимкыште ужыда. 13-15 ияш-влак коклаште Илья МАКСИМОВ (Волжский, Пӧтъял) сеҥышыш лектын.
Тыныс илыш эн шерге Тӱнямбалне илыш пеш писын вашталтеш. Кундем ден кундем коклаште кредалмаш кая, икте-весым умылыдымаш озалана, шучко чер шарла. Чонлан моткоч каньысырын чучеш. Эсогыл игечыжат шӱлыкаҥеш, шортеш. Тыгай кончыш лиймылан ме, калык, шкежат титакан улына. Осаллан мучашым шукташ неле, но ӱшан нигунам ок йом. Поро Йӱштӧ кочай! Эн шергакан пӧлек мылам – калыкын ваш келшымашыже да тазалыкше. Тек шучко чер мемнан деч чакна, а калык шочмо кундемыштыже тыныс илыш дене ӱмыржым шуя.
