Кандаш лаштык… Мо гын тушто?
Калыкмут, йомак да тушто,
Мыскара – чыла марла.
Сай сӱрет да фотографий,
Шочмо верже – типографий.
Мо гын тиде? Кӧ пала?
Чынак, йоча-влак, тиде «Ямде лий» газет. Савыктышын содержанийже почеламут корнылаште ончыкталтын. Кажне номерыште школ илыш, йоча-шамычын пашашт да творчествышт дене палдарена. Арня еда тӱрлӧ рубрикылан пӧлеклалтше странице-влакым ямдылена. Ончыкыжымат лӱмлӧ да уста еҥ, чапланыше коллектив, кундемнан историйже, калыкын илыш-йӱлаж дене кылдалтше материал-шамычым савыкташ тӱҥалына. Чыла тидым пален налаш кумылан улыда гын, 2025 ийын икымше пелийжылан «Ямде лий» газетлан шулдырак ак дене возалтса.
2-12 декабрьыште Россий мучко подписчикын декадыже эртаралтеш. Ак – 426 теҥгеат 24 ыр. Индекс – П4696.
Морко районышто илыше да тӱрлӧ школышто тунемше-влак 400 утла экземпляр «Ямде лийым» налыт. Теве 6-шо номеран Морко школышто тунемше Маша Цветникова, йоча газетым лудын, сылнымутлан шӱмаҥын. Усталыкшым почеламутым сылнын лудмо конкурслаште терга, сеҥыше-влак радамышкат лектеш. Стелла Кузнецова, Кристина Русанова, Вероника Петрова 2-шо номеран Морко школышто тунемыт, йоча газет дене кылым кучат. «Ямде лийым» уроклаште кучылтына, марий калыкын тӱвыраже, йӱлаже нерген пайдале материалым лудына», – ойлат ӱдыр-влак.
М.СЕМЕНОВА ден Е.СЕРГЕЕВАН фотожо.
