«Артек» тӱнямбал йоча рӱдерыште «Звезда Артека» конкурсым иктешленыт. Йоча-влак смене жапыште шкеныштым чолган ончыктеныт. Смене мучаште йӱклымӧ почеш сеҥыше-шамычым ойыреныт. Кумшо сменыште куд артековец сеҥышыш лектын. Ик шӱдыржӧ – «Кипарисный» лагерьыште каныше Ольга Номанова. Тудо Йошкар-Ола гыч! Бауман лицейыште тунемеш, «Артекыште» кокымшо гана лийын.
– Ты гана «Артекышке» олимпиадылаште да муро конкурслаште сеҥымемлан миенам. «Звезда Артека» конкурсышто сеҥашлан чыла этапым эрташ кӱлын. Ӱдыр-рвезе-влаклан мастарлыкем ончыктенам. Семӱзгар дене шоктенам, нуным туныктенам да шке гыч мурсемым келыштараш тыршенна. Лагерь гыч мый волгыдо кумыл дене пӧртылынам. Шуко у йолташым вашлийынам. Тыландат тиде «йоча пагытысе элыш», «Артекыш», логалаш тыланем! – ойла Ольга.
Ольган каныме кумшо смене «Крым. Артек. Россия» лӱм дене эртаралтын. Кок тӱжем наре йоча канен, индешыже Марий Эл гыч лийын. Кызыт нылымше смене тӱҥалын.
Катя СЕРГЕЕВА ямдылен.
Снимкыште: Ольга Номанова да Мужество орден дене кок гана палемдалтше Илья Подорога.
Фотом Марий Элысе Образований да науко министерствын сайтше гыч налме.
