Йочалан пӧлеклалтше савыктыш-влак юзо виян улыт. Нуно кажне лаштыкышт гоч порылыклан туныктат, чолга ӱдыр-рвезе дене палдарат, йочан сылнымут саскажым иквереш чумырат. Тыгайым кидыш кучен лаштыклаш – куан.
Марий йоча «Ямде лийым» лудеш гын, Мордовий Республикыште илыше мокша ӱдыр-рвезе-влак «Якстерь тяштеня» («Йошкар шӱдыр») журналлан подпискым ыштат. Изирак ийготан икшыве-шамычлан пӧлеклалтше савыктыш лудшо-влакымпочеламут, ойлымаш, йомак да вес сылнымутан произведений дене куандара. Ятыржым йоча-влак шке возат.
– «Якстерь тяштеня» тылзылан ик гана лектеш. Тиражше 600 наре экземпляр, – ойла журналын тӱҥ редакторжо Вера Ивановна Брындина (снимкыште). – Икшыве-шамыч куанен лудыт. Редакций пашаеҥ-влакын эртарыме мероприятийлашке кумылын ушнат. Фотоконкурсым поснак аклат. Ме школлаште, книгагудылаште да ялысе тӱвыра пӧртлаште вашлиймашым эртарена. Шочмо йылме дене савыкталтше книга, журнал, газет-шамыч йылмым йӧратыше, тӱвырам пагалыше да калыкым аклыше еҥым кушташ полшат.
Палемден кодыман: мордва калыкым мокша да эрьзя этнический тӱшкалан пайлат. Эрьзя лудшо-влаклан «Чилисема» («Эр ӱжара») журнал савыкталтеш.
Оля МАЙКОВА.
Авторын фотожо.
