Кеч-могай уста туныктышо – йочалан сай пример. 3-шо номеран Советский школышто физкультурым А.С.Коновалов туныкта. Андрей Серафимович ӱдыр-рвезе-шамычым ынде 34 ий шуара. Шкеже – телымсе полиатлон дене Российын спорт мастерже. Кызытат ече дене талын коштеш. Йоча-влак, тудым ончен, кугу кӱкшытыш шуыт. Нуно, тунемше-шамычын всероссийский спорт модмашыштын регионысо йыжыҥыштыже сеҥен, российысе таҥасымашке кок гана миеныт.
– Командыште 2010-2011 ийлаште шочшо куд ӱдыр ден куд рвезе (снимкыште) лийыныт. Нуно куштылго атлетике, баскетбол, волейбол, футбол, ӱстембал теннис дене чулымлыкыштым тергеныт. 89 кундем гыч погынышо спорт-смен-шамыч дене таҥасаш куштылго лийын огыл. Ӱмаште 34 верыште лийынна гын, те-ний – 25-ше. Таҥасымаш коло кече шуйнен. Вий-куат, чытыш кӱлыныт. Спорт шукылан туныкта да моло аланыштат талырак лияш тарата, – ойла Андрей Серафимович.
Ӱдыр-рвезе-влакын районысо, республикысе таҥасымашлаште сеҥымашышт ятыр. «Белый Мишка» республикысе фестивальыште, «Серебряный мяч» волейбол дене таҥасымаште кокымшо верыш лектыныт. 2013-2014 Сеҥымаш дене куандарат ийлаште шочшо ӱдыр-рвезе-влак коклаште баскетбол дене Марий Эл Республикын первенствыштыже призёр лийыныт. «Кэс-баскет» таҥасымашын зональный йыжыҥыштыже ӱдыр-влак кокымшо, рвезе-шамыч кумшо верым сеҥен налыныт. А районысо сеҥымашыже нимучашдыме!
– Школыштына йоча-влак моткоч чолга улыт. Но эн виян спортсмен-шамычым палемдыде ом керт. Тиде Мария Волкова, Алиса Смирнова, Наталья Шестерова, Полина Ермакова, Кирилл Максимов, Екатерина Васильева. Спортышто нунын корнышт моткоч волгыдо. Тыршат гын, кугу кӱкшытыш шуын кертыт, – ойла Андрей Коновалов.
Христина АЛЕКСАНДРОВА.
Фотом школ архив гыч налме.
