Йочам курчак куандара

Мультфильм але йомак гыч палыме геройым ужын, кажне йоча йывырта. Айдеме кӱкшытан курчакым вашлиймеке, куанже мыняре! А те паледа, курчакын вургемже йымалне кӧ шылын? Аниматор. Тачысе героем – Йошкар-Оласе Тӱвыра да каныме рӱдӧ паркыште режиссёрлан тыршыше,  вӱдышӧ да аниматор К.Р.МИХАЙЛОВ.

– Кирилл Радикович, аниматор лияш мо таратен?

– Кодшо курымын 90-ше ийлаштыже аниматор нерген  шагал еҥ пален. Тунам ты пашам клоун-влак шуктеныт.   Мый аниматор лиям манын нигунам шонен омыл.  Йошкар-Оласе рӱдӧ паркыште пайремым эртараш еҥ кӱлын. Тушко мыйым йолташем ӱжын. Тунам аниматорын пашажым сайын пален омыл гынат, маска курчакын вургемжым чиен, йоча-влак дене пырля   веселитленам. Тыге микрофоным кидыш икымше гана кученам. Ты профессий нерген утларак пален налын, йоча-влак дене мутланаш, нуным куандараш, модыкташ тунемынам.

– Тугеже ӱдыр-рвезе-влак коклаште те шкежат йочаш савырнеда?  

– Пырля модын, веселитлен, шкежат йочала чучам. Нуно мемнам эн пиаланым ыштат. Вийым пуат, пашалан кумылаҥдат. Ме, аниматор-влак, модмо йӧре йоча-шамычым молан-гынат туныктышаш улына. Ямдылыме программым ончен, йоча-влак кӱлешанжым  шарнен кодышт манын тыршена. А программым ме тачысе илышлан келыштарена.

– Герой-влаклан костюмым шке ямдыледа?

–  Йошкар-Оласе Тӱвыра да каныме рӱдӧ паркын вургемым ургымо цехше  уло.  Костюмер-влак ий мучко тӱрлӧ вургемым ямдылат.

– Тыланда пайремыште вӱдышӧ лияш але иктаж геройым модаш утларак келша?

– Мыланем тӱрлӧ геройын образшым чоҥаш логалын: Маска, Незнайке, Клоун да молат. Аниматор артист гай лийшаш. Тидлан мый кызытат тунемам. Пытартыш жапыште сценышке вӱдышӧ семын лекташ утларак логалеш.