Йошкар-Оласе Бауман лицейысе дистанционный тунемме рӱдерын тунемшыже ден туныктышыжо-влак математике заданиян ойыртемалтше икмыняр сборникым савыктеныт. Йоча-шамычым Кугу Ачамланде сар, Сталинград кредалмаш, Марий Элын рӱдолаже, округ ден районлаже, пӱртӱс поянлыкше да пошкудо республикла дене палдараш оҥай йӧным темлат. Йодыш-влак гоч!
«Математическое путешествие по родному краю» – тыге маналтеш 2024 ийыште лекше икымше сборникышт. Тудым ятырын ямдыленыт. Тунемше-влак коклаште Матвей Дудиным, Алексей Волковым, Софья Мадигуловам палемдыман. Кызыт нуно 11-ше классыште тунемыт. Туныктышо-шамыч Е.А.Беловолова, Е.А.Жигалова, Л.А.Чугунова, И.В.Яковлева чот тыршеныт. Лицей директор Григорий Ефимович Пейсахович пеш кугу полышым пуэн. Автор-влак Марий Эл да пошкудо республикла нерген уверым кычалмышт годым книгалам, газет ден журналлам, документ-шамычым лаштыкленыт, интернетлан эҥертеныт, шке эскерымыштым шотыш налыныт.
– Проектын тӱҥ шонымашыже – математике ден краеведенийым ушаш. Йодышышто шочмо республик нерген пример пуалтеш гын, тиде йочам шотлаш веле огыл, шке кундемым шымлаш тарата. Сборник 2-6-шо класслаште тунемше ӱдыр-рвезе-влаклан келшен толеш, – ойла проектын ик вуйлатышыже, учитель-дефектолог Елена Андреевна Жигалова. – 2025 ийыште «Необычный задачник военной памяти: вклад Марийской АССР в Великую Победу» пашам сывыктенна. Шукерте огыл «Герои и народы в битве за Сталинград» сборник лектын.
Бауман лицейысе дистанционный тунемме рӱдерыште шинчымашым погышо Ярослав Ожиганов сборникым ужшо йоча-влак кокла гыч икымше лийын. Тудлан заданий-влакым тергаш ӱшаненыт.
– Мыланем ола нерген проектыш ушнаш да математике задаче-влаклан вашмутым кычалаш темленыт. Пеш йывыртенам. Йошкар-Ола да Марий Эл нерген ятыр оҥайым пален налынам. Математикым йӧратыше, шочмо кундемым шымлыше ӱдыр-рвезе-влаклан ты сборникым налманак. Тергыме годым изирак лийынам, кызыт шымше классыште тунемам. У сборник-шамычлан йодыш-влакым ямдылаш ынде шке полшем, – палдарыш рвезе.
Оля МАЙКОВА.
Фотом лицейын архивше гыч налме.
