Олаште илыше да марла чаткан кутырен моштышо йоча кугешныме кумылым ылыжта. Теве Йошкар-Оласе 4-ше №-ан гимназийын 5-ше классыштыже тунемше Таня ЗЫКОВА изинек марий шӱлышан кушкеш. Марий йылмым йӧрата, сылнымутым шижын мошта. Валентин Колумбын почеламутшо-влакым чонеш логалшылан, эн лишыллан шотла. Кажне кастене икмыняр почеламутшым лудде малаш огеш воч. Арамлан огыл Таня «Колумб лудмаш» оласе конкурсышто 1-ше верыш лектын, регион-влак кокласе конкурсышто 2-шо лийын.
– Ешыште марла мутланена, сандене шочмо йылме мыланем эн лишыл. Авам йочасадыш коштмем годымак сылнымутлан шӱмаҥден. Изиэм годым шуко книгам лудын. Кызыт книга – лишыл йолташем. Ынде Даша шӱжаремым лудаш кумылаҥдем. Кажне кастене йомакым пырля лудына, – ойла Таня.
