Марий-влак ожнысек пӱртӱсын вийжылан эҥертат. Полышым йодаш отыш коштыт, суртышто еш кумалтышым эртарат. Ты йӱла нерген коча-ковам ятыр палат. Мыланемат радамлен каласкаленыт.
1986 ийыште кочам ешыж дене Нурсола ялыш илаш куснен. Лач ты жап гыч «Сурт Серлагыш» кумалтыш йӱла ешыштына шукталтеш. Тудо вич ийлан ик гана эртаралтеш. Ик тага, кок комбо да кок лудо дене кумалман. Кумалтышлан ончылгоч ямдылалтман. Кушшо тылзым эскерыман, карт кугыза дене мутланен келшыман. Кажне еш шкалан келшыше жапым ойыра. Мыланна октябрь мучаш гыч декабрь рӱдӧ марте йӧнан.
Кумалтыш деч ончыч чылан мончаш пурат, ару вургемым чият. Суртым эрыктат. Пайрем вашеш, кастене, ешыште эн кугу ӱдырамаш мелналан да киндылан руашым луга. Ты сомылым ковам Галина Михайловна Шибанаева шукта. Эр эрдене ӱстембак мелнам, тичмаш киндым шындат. Ший оксам пыштен, туарам вераҥдат. Шыште сортам чӱктат. Сортам кочам Илья Гаврилович Шибанаев ямдыла. Тыгеракын кумалтышым тӱҥалыт. Сурт кугыза деч тазалыкым, перкем йодыт.
Лена ИВАНОВА.
Кужэҥер, Коҥганур.
Фотом еш архив гыч налме.
