Кеҥеж, мотор кеҥеж! Чевер кече ончалеш – уло тӱня волгалтеш. Ылыжеш у вий дене, чоным куандарыше у сын дене. Кеҥежын эн кугу поянлыкше – ужар шудо да тӱрлӧ тӱсан пеледыш.
Мыланем чыла пагыт кокла гыч кеҥеж утларак келша. Кум тылзе шуйнышо каникул тӱҥалын. Яра жап моткоч шуко. Ковам Юлсер кундемыште ила. Туддеке унала коштына. Тораште огыл Элнет йоген эрта. Чӱчкыдын тушко миен толына (снимкыште). Мо оҥайже, Элнет телымат ок кылме. Шке яндар вӱдшӧ дене теле гоч юарла. Арамлан огыл С.Г.Чавайн романыштыже Элнетлан тӱҥ верым ойырен. Элнет тыглай эҥер огыл, илыше вӱд, пӱртӱс муро, юзо вий. Йӧнда лиеш гын, тушко миенак толза. Пӱртӱсын мотор вержым ончалза.
Дима УХОВ.
Йошкар-Ола, 7-ше номеран школ.
Фотом еш архив гыч налме.
