Настя Заболотская Шернур посёлкысо 1-ше номеран школын 7-ше классыштыже тунемеш. Икымше класс гычак верысе Йоча усталык пӧртыштӧ мурымо мастарлыкшым вияҥда. Туныктышыжо – Т.И.Рыбакова. «Настян икымше конкурсшо «Идалыкын мурыжо» йоча эстраде телевизионный конкурс лийын. Национальный президент школ-интернатыште икмыняр жап тунеммыж годым М.Шкетан лӱмеш театрыште «Югорно» спектакльыште изирак рольым модын», – каласкала Татьяна Ивановна. Тылеч вара районысо да регион-влак кокласе ятыр конкурсышко ушнен да сеҥымашке шуын. «Марий муро чонемлан лишыл. Ончыкыжым театр да кино артистке лияш шонем», – ойла Настя.
