«Юнармий» йоча да самырык-влак всероссийский военно-патриотический толкын 2016 ийыште вияҥаш тӱҥалын. Йошкар-Оласе 16-шо номеран школышто тунемше-влак Марий Элыште эн ончыч юнармеец радамыш ушненыт (2017 ий). Шолышто «Юнармий» толкыным директорын воспитательный паша шотышто алмаштышыже, «Юнармий» рӱдоласе штабын еҥже О.А.Алдынова вуйлата.
– Школна «Юнармий» толкынын пашажым вияҥдыше инновационный площадкылан шотлалтеш, – ойла Ольга Александровна. – Марий Элысе МЧС дене кылым кучена. Йоча-влак МЧС-ын историйже, военный технике дене палыме лийыныт. Тений Йошкар-Оласе «Азимут» йоча да самырык-влак рӱдер дене вашкылым ыштенна. Ӱдыр-рвезе-влак спорт ориентирований дене шинчымашым налыт, икымше полышым пуаш тунемыт. Тӱрлӧ таҥасымашке ушнат, сеҥымаш-влак дене куандарат. Кажне кечын строй дене коштыт, автоматым писын погымо да рончымо мастарлыкыштым вияҥдат.
5-ше «Б» классын командирже – Ульяна Наумова. Тудо йолташыже, туныктышыжо-влакын ӱшаныштым сулашак тырша. «Ме 3-шо классыште тунемме годым юнармеец радамыш ушненна. Товатлыме мутым ойленна, – каласкала Ульяна. – Шкенан девизна, мурына уло. Юнармеец лияш – куан да чап. Йолташем-влак чолга улыт. Чылан спорт дене кылым кучат, тӱрлӧ кружокыш коштыт. Костя Васильев спорт ориентирований дене ятыр сеҥымашке шуын. Шукерте огыл «Весёлые эстафеты» оласе спорт турнирыште таҥасенна. «Дружная команда» таҥасыште сеҥышыш лектынна».
Йошкар-Оласе 16-шо номеран школышто тунемше-влак Оборонно-массовый да военно-патриотический паша месячник годым кумло утла мероприятийым эртареныт.
Снимкыште: 16-шо номеран школын юнармеецше-влак – Марий Элын шочшыжо, Тӱнямбал танк биатлонышто Россий сборныйын командирже, лейтенант Дмитрий Иванов дене пырля.
Фотом школ архив гыч налме.
*Марий Эл Республикыште 92 кадет класс, 83 военно-патриотический клуб, 144 юнармий отряд уло. Чылаже 8 тӱжем 600 наре йочам авалтыме.
