Шернур посёлкысо Тӱвыра да каныме паркыште «Волшебный сундучок» республикысе фестиваль-конкурс эртаралтын. Тудо калык йомак ден мифласе герой ден персонаж-влаклан пӧлеклалтын. Тушто тӱрлӧ район, округ гыч ӱдыр-рвезе-шамыч тӱвыра пашаеҥ, туныктышышт дене пырля мастарлыкыштым тергеныт.
«В мире сказок и мифов» таҥасыште Советский район Роҥго тӱвыра пӧрт пеленысе «Театралы» эстраде театр (вуйлатыше – А.Н.Полушина) «Иван и Царевна» фольклор да модыш программе дене чыланыштым ончылтен. «Сказка моей (нашей) семьи» таҥасыште Шернур округысо тӱвыра да каныме рӱдерын усталык коллективше (снимкыште) сеҥышыш лектын.
– «Поро йомакым» тӱвыра рӱдерын пашаеҥже-влак Людмила Ивановна Таныгина ден Екатерина Дмитриевна Суворова шонен возеныт. Йомакын геройжо-шамыч Онар патыр, поро, да тыгодымак осал маска, мланде пашам ыштыше марий пӧръеҥ лийыныт. Кеч-могай марий йомакыште поро осалым сеҥа. Мемнанат тыгак. Марий пӱртӱс вийым пуа, а ме тудым аклен илышаш улына. Йомакна тидлан туныкта. Постановкышто вич еҥ лийын: коча ден кова да нунын кум уныкашт. Уныка-шамычын рольыштым 1-ше номеран Шернур школышто 6-шо «В» классым тунем пытарыше-влак Назар Смоленцев, Иван ден Михаил Яковлевмыт модыныт. Пӱртӱсын образыштыже Шернур посёлкысо И.Н.Молотов лӱмеш йоча сымыктыш школ пеленысе «Арабеск» куштышо коллектив лийын, – ойла тӱвыра да каныме рӱдерын художественный вуйлатышыже Н.М.Чиванова.
Фестивальыште тыгак «Сказочная страна» сӱрет, «Очумелые ручки» калык арвер да сымыктыш конкурс-влак лийыныт. Жюри еҥ-шамыч ойыртемалтше паша-влакым кӱкшын акленыт.
Христина АЛЕКСАНДРОВА.
Фотом рӱдерын архивше гыч налме.
