Настя Соловьёва Советский посёлкысо 3-шо номеран школын 9-ше классшым йошкар аттестат, Йоча усталык школым йошкар свидетельстве дене тунем пытарен. Уста тунемше, активистке изинек уш-акылжым пойдара, ум пален налаш тырша. 5-ше класс гыч Йоча усталык рӱдер пеленысе «Радуга добра» волонтёр отрядыш коштеш. Кызыт шкежат вожатый семын пашам ышта. «Огонёк» дистанционный онлайн-отрядыште, «Планета детства» экологий отрядыште вожатый лийын.
– Кажне еҥ юзо лийын кертеш. Тидлан лач поро чон, умылымаш да весела кумыл кӱлыт. Йоча-влаклан полшаш, куаным кондаш – мыланем пиал. Волонтёр паша эн оҥай, – ойла Настя.
Настя шкеж гаяк чолга ӱдыр-рвезе-влак дене пырля тӱрлӧ мероприятийым эртара. «Импульс» республикысе лагерьыште кажне ийын лидер койышыжым вияҥда, вожатый курсышто шинчымашыжым пойдара.
– «Импульслан» кӧра койыш-шоктышем вашталтын. Мый еҥ-влак дене кылым ышташ, оҥай модышым але конкурсым писын шонен лукташ тунемынам. Ончыкылык илышемым йоча-влак дене кылдынем: педагог лияш шонем, – палдара чолга ӱдыр.
Юзо тӱням пӧлекла
