Этнокультур предметла дене республикысе олимпиадым иктешлымылан кок кече эртышат, Марий кугыжаныш университетыш марий йылмым да сылнымутым эн сайын палыше тунемше-влак уэш погынышт. 12 февральыште Марий Эл, Удмурт, Татарстан республикла да Свердловск кундем гыч 29 икшыве регион-влак кокласе олимпиадыште шинчымашыжым тергыш. Ӱдыр-рвезе-влак шкеныштым пеҥгыдын, ӱшанлын кучышт. Пеленышт улшо туныктышо-шамычын ойышт вий-куатым эшеат ешарыш. Нуно ий гыч ийыш тунемшышт-влаклан сеҥымашыш шуаш полшат.
– Кажне туныктышо дене палыме улына. Вашлийме годым родо улмыла веле чучеш. Шочмо йылме дене аптыраныде мутланыше тунемше-влакым ужаш эшеат куанле. Ӱшанена: умбакыжат ты койышым араледа да тыгаяк чолга ӱдыррвезе-влак дене пырля калыкнан волгыдо ончыкылыкшо верч тыршаш тӱҥалыда, – ойлыш Марий кугыжаныш университетысе Калыкле тӱвыра да тӱвыра кокласе кыл институтын директоржо Родион Иванович Чузаев.
Уш-акыл таҥасымашым иктешлен, Морко (снимкыште) ден Параньга районла гыч толшо тунемше-шамычым поснак палемден кодыман: нуно сеҥыше-влак радамыш чылан гаяк лектыныт. Тора кундем гыч ушнышо ӱдыр-рвезе-влак кокла гыч Татарстан Республик Агрыз район Буймо школышто 10-шо классыште тунемше Ксения Миляева ойыртемалтын.
Дария Лихачёва (Национальный сымыктыш гимназий, 9-ше класс), Максим Степанов (Морко, Унчо, 10-шо класс), Василиса Смородинова (Советский, Ӱшнӱр, 11-ше класс) марий йылме дене икымше верым налыныт. Марий литератур дене Лилия Калинина (Матародо, 9-ше класс), Алёна Архипова (Параньга, Матародо, 10-шо класс), Елена Иванова (Кужэҥер, Коҥганур, 11-ше класс) сеҥышыш лектыныт.
Катя СЕРГЕЕВА.
Авторын фотожо.
